ჩელსი-ბარსელონა: საინტერესო ფაქტები

ხვალ, შვედეთის ქალაქ გეტებორგში, “ბარსელონას” ქალთა გუნდი არსებობის მანძილზე ერთ-ერთ ყველაზე მნიშვნელოვან შეხვედრას გამართავს. კატალონიელები UEFA-ს ჩემპიონთა ლიგის ფინალში “ჩელსის” დაუპირისპირდებიან. 

წარმოგიდგენთ საინტერესო ფაქტებს მატჩის მონაწილე გუნდების შესახებ. 

• ხვალინდელი მატჩის გამარჯვებული გახდება პირველი კლუბი ისტორიაში, რომელსაც მამაკაცთა და ქალთა ჩემპიონთა ლიგა ექნება მოგებული. ორივე ტურნირი აქამდე არავის მოუგია. 
• ბარსელონელები ლიგის ფინალში მეორედ ითამაშებენ. გუნდი ტურნირის გადამწყვეტ ეტაპზე პირველად 2019 წელს გავიდა და ბუდაპეშტში “ლიონთან” დამარცხდა, “ჩელსისთვის” კი წლევანდელი ფინალი სადებიუტოა. 

• “ბარსას” და “ჩელსის” ქალთა გუნდების ურთიერთშეხვედრების ისტორია მხოლოდ ერთ თამაშს მოიცავს. ამხანაგური მატჩი კატალონიაში, “მინი ესტადიზე” 2018/19 წლების სეზონში ჩატარდა და ფრედ, 1-1 დასრულდა. 
• “ბარსელონას” ერთადერთი წევრი, რომელსაც ფინალში გოლი აქვს გატანილი, აზიზატ ოშოალაა. ნიგერიელმა ფეხბურთელმა “ლიონის” 4 გოლს ერთი შედეგიანი დარტყმით უპასუხა. 
• “ბარსას” ჯენი ერმოსო და “ჩელსის” ფრან კირბი ჩემპიონთა ლიგის ბომბარდირთა დავის ლიდერები არიან. ორივე მათგანს 6 გოლი აქვს გატანილი. 
• ანა ჩრნოგორევიჩი “ბარსას” ახლანდელი შემადგენლობის ერთადერთი მოთამაშეა, რომელსაც ჩემპიონთა ლიგის ფინალში უთამაშია და ამასთან ერთად თასი მოგებული აქვს. მან ტიტული 2015 წელს “ფრანკფურტთან” ერთად მოიპოვა. 
• საინტერესოა, რომ ხეირა ამრაუის, რომელიც “ლიონთან” ერთად ჩემპიონთა ლიგის 2-გზის გამარჯვებულია, ჩრნოგორევიჩის მსგავსი შედეგი არ აქვს. ფრანგი ნახევარცველის გუნდები ფინალში 5-ჯერ მოხვდნენ, თუმცა სხვადასხვა მიზეზის გამო ამრაუიმ მონაწილეობის მიღება ვერცერთ შეხვედრაში ვერ მოახერხა. 

• “ბარსას” ნორვეგიელი ნახევარმცველი, კაროლინ ჰანსენი, “ვოლფსბურგში” თამაშის დროს ლიგის მოგებასთან 2-ჯერ ძალიან ახლოს იყო, თუმცა მისი გუნდი ერთხელ დამატებით დროში დამარცხდა, ერთხელაც კი პენალტების სერიაში. 
• ლიკე მარტენსისთვის ხვალინდელი მატჩის ლოკაცია ნაცნობი იქნება – ის 2014-15 წლებში “გეტებორგის” ფეხბურთელი იყო. 
• ბუდაპეშტის ფინალის სასტარტო შემადგენლობის 11 წევრიდან 10 ისევ “ბარსელონაში” თამაშობს. 

შეგახსენებთ, რომ “ბარსა”-“ჩელსის” დაპირისპირება ხვალ, თბილისის დროით 23 საათზე დაიწყება.