შესაძლოა ბარსელონაში რაფა მარკესი დაბრუნდეს

“ბარსელონას” პრეზიდენტს, ჟოან ლაპორტას, კლუბში გუნდის მექსიკელი ყოფილი მცველის, რაფაელ მარკესის, დაბრუნება სურს, იტყობინება Sport.

მოლაპარაკების წარმატებით დასრულების შემთხვევაში, მარკესი მუშაობას “ბარსას” ერთ-ერთ ასაკობრივ გუნდში დაიწყებს.

აქამდე, 2018-2019 წლებში, მარკესი მშობლიურ კლუბ “ატლასში” სპორტული დირექტორის თანამდებობას იკავებდა, შემდეგ კი, მცირე ხნით, ესპანეთის რანგით მეოთხე ჩემპიონატში მოასპარეზე “ალკალას” მთავარი მწვრთნელი გახლდათ.

კატალონიური გამოცემა წერს, რომ შესაძლოა, “ლა მასიაში” “ბარსელონას” კიდევ ერთი ყოფილი ფეხბურთელი, სერჟი ბარჟუანი, ვიხილოთ.

იგი “ბარსელონას” აღზრდილია და პირველ გუნდში კარიერის 9 წელი გაატარა. ბარჟუანის სამწვრთნელო გამოცდილება შემდეგ გუნდებს ითვლის: “ბარსა 18-წლამდელები”, “რეკრეატივო უელვა”, “ალმერია”, “მალიორკა” და ჩინური “შეჟიან გრინთაუნი”.