სანაკრებო მატჩები დასრულდა | “ბლაუგრანელთა” თამაშები

სანაკრებო პაუზა დასრულებულია.

დღეს საქმეში 7 “ბლაუგრანელი” ვიხილეთ. მათგან 4-მა კი თავი შედეგიანობითაც გამოიჩინა.

ეროვნული ნაკრებების მიღმა თავი ჯერ ფრანსიშკუ ტრინკაუმ გვასახელა, ის პორტუგალიის 21-წლამდელთა ნაკრებს შვეიცარიელ თანატოლებთან გამარჯვებაში გოლით დაეხმარა.

მარტინ ბრეითუეიტი

დანიის ნაკრები ავსტრიას ესტუმრა და გამანადგურებელი სხვაობით, 4-0 იმარჯვა. დანიელთა წარმატებაში მცირე წვლილი მარტინ ბრეითუეიტმაც შეიტანა, რომელმაც ასისტი შეასრულა და ჰოიბიერგს გაატანინა. დანიელებს ძალიან ძლიერი გუნდი ჰყავთ, ამ სანაკრებო პაუზაზე ყველაზე შთამბეჭავად სწორედ ისინი გამოიყურებოდნენ.

პედრი, სერხიო ბუსკეტსი & ჟორდი ალბა

“ფურია როხამ” პირველ ტურში საბერძნეთთან დაკარგული ქულების შემდეგ, საქართველოსთან და კოსოვთან ქულათა მაქსიმალური რაოდენობა მოიპოვა. ამ შემთხვევაში, პირენეელებმა გამარჯვება გაცილებით მარტივად შეძლეს. მათ კოსოვო საშინაო კედლებში 3-1 დაამარცხეს.

“ბლაუგრანელთა” შორის ორმა მათგანმა, ჟორდი ალბამ და პედრიმ თავი ასისტებით გამოიჩინა.

პედრის პასის შემდეგ გოლი ფერან ტორესმა გაიტანა. ალბას გადაცემით კი დანი ოლმომ კიდევ ერთი შედევრი შემოგვთავაზა.

ანტუან გრიზმანი, მირალემ პიანიჩი

ანტუანმა საფრანგეთის ეროვნულ ნაკრებს კიდევ ერთხელ ულიდერა და თანაგუნდელის წინააღმდეგ მინიმალური სხვაობით იმარჯვა.

იმ ერთადერთი გატანილი გოლის ავტორი კი სწორედ გრიზმანი გახლავთ.

მარკ-ანდრე ტერ შტეგენი

სანაკრებო პაუზის უდიდესი სენსაცია გერმანიაში დაფიქსირდა და “ბარსას” მეკარეს, მარკ-ანდრე ტერ შტეგენს გადახდა თავს.

ჩრდილოეთ მაკედონიამ დუისბურგში გერმანიია დაამარცხა. შედეგად კი ჯგუფს სათავეში სომხეთის ნაკრები ჩაუდგა, რომელსაც უკან მაკედონია მოჰყვება. 

გაშვებულ გოლებში მარკს ვერ დავადანაშაულებთ, თუმცა, აღსანიშნავია, რომ გერმანია 20 წლის შემდეგ მსოფლიოს ჩემპიონატის საკვალიფიკაციო ეტაპზე პირველად დამარცხდა.