ანსუ ფატი ჟურნალისტის მხრიდან რასიზმის მსხვერპლი გახდა

შავკანიანი ფეხბურთელები რასიზმის მსხვერპლნი არაერთხელ გამხდარან და ისეთი პირი უჩანს, ეს პრობლემა უახლოეს მომავალში ვერ მოგვარდება.

ბოლო დროს რასიზმის შემთხვევა არ ყოფილა, რისი მიზეზიც მარტივია – გულშემატკივრების სტადიონზე დაშვება შეზღდული ან აკრძალულია. თუმცა, “ბარსელონასა” და “ფერენცვაროშის” მატჩის შემდეგ მოხდა ისეთი რამ, რაც თანამედროვე სამყაროსთვის უცხოა – რასიზმის აშკარა ფორმებს თამაშის მიმომხილველმა ჟურნალისტმა მიმართა.

ABC Espana-ს ჟურნალისტმა სალვადორ სოსტრესმა “ბარსელონას” 17 წლის ვარსკვლავი ანსუ ფატი გაზელსა და პატარა შავ მანტეროს შეადარა. გაზელი ანტილოპას ოჯახის წარმომადგენელი ცხოველია, მანტეროს კი ესპანეთში ყალბი პროდუქციით ქუჩაში მოვაჭრე ადამიანს უწოდებენ.

სოსტრესი წერს: “ანსუს სირბილი გაზელს გაგონებს, ან ძალიან ახალგაზრდა შავ მანტეროს, რომელიც პასეო დე გრასიას ქუჩებში დარბის იმ დროს, როდესაც ვინმე ყვირის “წყალი, წყალი!”. ამ სიტყვების მანტეროები ერთმანეთს პოლიციის გამოჩენას ამცნობენ. ახლა მსგავსი რამ აღარ ხდება, რადგან ბარსელონას მერი ადა კოლაუ, პოლიციასთან ერთად, თავადაა კრიმინალი და არა მანტეროები, რომლებსაც სირბილი აღარ უწევთ. ისიც სიმართლეა, რომ ტურისტების გარეშე მანტეროების ბიზნესი ძალიან დაზარალდა.”

ეს სტატია Twitter-ის საშუალებით დაგმო ანტუან გრიზმანმა, Cadena SER კი იტყობინება, რომ დღეს “ბარსელონა” სალვადორ სოსტრესს უჩივლებს.