“შეუბრალებელი”

რონალდ კუმანმა პრემიერ ლიგაში თავისი კვალი დატოვა. შესაძლოა მწვერვალები არ დაუპყრია, მაგრამ თავი ყველას დაამახსოვრა. “საუთჰემპტონთან” ერთად, პირველივე სეზონში დაიკავა მეშვიდე ადგილი და მხოლოდ დიდ ექვსეულს ჩამორჩა, მეორე სეზონში ერთი საფეხურით მაღლა აინაცვლა, “ჩელსი” და “ლივერპული” უკან მოიტოვა. კარგი მუშაობა დაუფასდა და “ევერტონში” ამოჰყო თავი, სადაც კლუბის მფლობელმა, ფადრახ მაშირიმ “შეუბრალებელი” უწოდა. ეს მისი ხასიათისა და მეთოდების გამო მოხდა. კუმანმა სავარჯიშო დრო დილის ცხრა საათზე გადმოწია და მკაცრად აკონტროლებდა, რომ ყველაფერი თავის დროზე მომხდარიყო, მრისხანება არ დაუმალავს, როცა კლუბმა რომელუ ლუკაკუ გაყიდა და მის ნაცვლად სანდრო რამირესი მოიყვანა.

Daily Mail-თან ინტერვიუში, კუმანმა აღნიშნა, რომ ის არ არის შეუბრალებელი და საკუთარ თავს უბრალოდ მომთხოვნ მწვრთნელს უწოდებს. იგივე გაიმეორა მცირე ხნის წინ, პრეზენტაციაზე, მაგრამ სხვების გადმოსახედიდან მართლაც რომ შეუბრალებელია და “ბარსას” ახლა სწორედ ეს სჭირდება.

ასევე გავრცელდა კუმანის ძველი ინტერვიუ, სადაც “ბარსას” შესახებ თხოვეს კომენტარი, ის კი გადაბერებულ ფეხბურთელებზე საუბრობს, ახლა თავად აქვს ძალაუფლება და ფაქტია, რომ გუნდის წმენდას შეუდგება, თანაც შეუბრალებლად.