ლუის სუარესს, ლიონელ მესის, სერხიო ბუსკეტსსა და ჟერარ პიკეს ახალგაზრდობა უკვე წარსულში აქვთ მოტოვებული.

“ბარსელონას” ოთხი გამორჩეული ვარსკვლავი ნელ-ნელა კარიერის დასრულებაზეც დაიწყებს ფიქრს.

იდეალური ვარიანტი, რასაკვირველია, ყველა მათგანის კატალონიურ გრანდში დარჩენა და კარიერის აქ დასრულება იქნებოდა, თუმცა ჩვენ იმ შესაძლო გუნდებს განვიხილავთ, რომლებზეც ჭორები ვრცელდება და გადასვლის მცირე, მაგრამ შანსი მაინც არსებობს.

ლიონელ მესი – მილანის “ინტერი”

მესის კონტრაქტს “ბარსელონასთან” ვადა უკვე მომავალ წელს ეწურება. რაც იმას ნიშნავს, რომ, შესაძლოა, არგენტინელი თავისუფალი აგენტი გახდეს.

“ნერაძურის” ინტერესებზე უამრავი ჭორი ვრცელდებოდა. მათ შორის 260 მილიონიან შეთავაზებაზეც იწერებოდა.

თავის მხრივ, ჟოზეპ მარია ბართომეუ მიიჩნევს, რომ “ბლაუგრანას” კაპიტანი სეზონის დასრულების შემდეგ ახალ კონტრაქტს აუცილებლად გააფორმებს.

ლუის სუარესი – მაიამის “ინტერი”

დევიდ ბექჰემს სუარესის დამატება თავის ახლადდაარსებულ MLS-ის გუნდში სურს.

“ელ პისტოლერომ” ამერიკაში თამაშთან დაკავშირებით განაცხადა, რომ ეს მისთვის საკმაოდ მომხიბვლელი გამოწვევაა.

ურუგვაელის კონტრაქტსაც ვადა მომავალ წელს გასდის, თუმცა, თუ თავდამსხმელი მატჩების 60%-ში მიიღებს მონაწილეობას, ის ავტომატურად გახანგრძლივდება.

ჟერარ პიკე – “ვისელ კობე”

ესპანელი მცველის კონტრაქტს ვადა 2022 წელს ეწურება და შესაძლოა, ის თავისი ძველი თანაგუნდელების კლუბში ვიხილოთ.

ანდრეს ინიესტა, სერჟი სამპერი და ტომას ვერმაელენი სწორედ “ვისელ კობეში” ასპარეზობენ.

გარდა ამისა, იაპონური გუნდის სპონსორი Rakuten არის, რომელიც “ბარსას” გარდა ასევე პიკეს კომპანიასთან, Kosmos Group-თანაც ფლობს საერთო კავშირებს.

სერხიო ბუსკეტსი – “ალ-სადი”

მომავალ სეზონში მირალემ პიანიჩთან და ფრენკი დე იონგთან კონკურენციის პირობებში, სერხიო ბუსკეტსმა, შესაძლოა, სასტარტო ადგილი დაკარგოს.

ჩავის კი მის ძველ მეგობრებთან მუშაობა საკმაოდ მოსწონს. მას გაბის გაწვრთნა უკვე მოუწია, მომავალი სეზონიდან კი სანტი კასორლასთანაც მოუწევს მწვრთნელის რანგში ურთიერთობა.

იმ შემთხვევაში, თუ “ბუსის” კატალონიური კარიერა დასასრულს მიუახლოვდება, შესაძლოა, ჩავიმ სწორედ ყატარულ კლუბში მიიპატიჟოს.