ვალვერდეს აჩრდილი “ბარსელონაში”

ბოლო ორ შევედრაში, კიკე სეტიენის “ბარსელონამ”, ჯერ ის გუნდი გაგვახსენა, რომელიც პანდემიის გამოცხადებამდე წვალობდა მოედანზე, შემდეგ კი ერნესტო ვალვერდეს გაწვრთნილი გუნდიც ამოგვიხტა გონებაში, რომელიც ძირითადად მოედნის ცენტრში აგორებდა ბურთს და არასდროს თამაშობდა პრესინგს, მეტოქის ნახევარზე. ერთი სიტყვით, “მალიორკასთან” მატჩის შემდეგ, სეტიენი საკუთარ თავს დაუბრუნდა, – წერს Marca.

ასეთი თამაშის გამო, ფანებთან ერთად, რწმენას ფეხბურთელებიც კარგავენ. გვახსოვს მესის განცხადება – “ასეთი თამაშით, ჩემპიონთა ლიგას ვერ მოვიგებთ“. სულ ცოტა ხნის წინ კი, პირველივე ფეხის დაცდენაზე, ჟერარ პიკემ გამოთქვა იგივე აზრი, ოღონდ ლა ლიგის შესახებ. – “ლა ლიგის მოგება, მიმდინარე სეზონში ძალიან რთული იქნება.” – ისეთი განცხადებაა, თითქოს თეთრი დროშა ააფრიალა და კაპიტულაცია გამოაცხადა, არადა წინ კიდევ 8 ტურია დარჩენილი.

კაპიტნებისგან მსგავსი სიტყვის მოსმენა, მთელი გუნდისთვის ძალიან დამთრგუნველია. 

ვალვერდეს აჩრდილი კვლავ დაძრწის “ბარსელონაში” და ეს ყოველ ჯერზე შეიმჩნევა, როცა გუნდი სწრაფ შეტევებს ვერ ახერხებს, უსახურ ფეხბურთს თამაშობს და დინამიურობას აბსოლუტურად მოკლებულია.

სათამაშო სტილი

“ბარსელონას” თამაშებს, მხოლოდ ერთგული ქომაგებიღა უყურებენ, არადა დრო იყო, მათ თამაშს მთელი მსოფლიო თვალს ადევნებდა, მადრიდის “რეალის” ფანებიც კი ტკბებოდნენ “ბარსას” ფეხბურთით, ალბათ ჩუმად უყურებდნენ, ფარდაჩამოფარებულ ოთახებში, ახლა კი “ბარსა” ისეთ დღეშია, თავისივე ფანებსაც უჭირთ იმის ყურება, რაც მოედანზე ხდება.

გამონაკლისი იყო “მალიორკასთან” გამარჯვება, თუმცა ასეთი გამონაკლისები, ვალვერდეს პერიოდშიც ყოფილა, ძირითადი სურათი კი არ შეცვლილა.

ეს გვაფიქრებინებს, რომ “მალიორკასთან” ემოციურმა ფონმა ითამაშა გადამწყვეტი როლი, ფეხბურთელებს ძალიან დიდი ხნის განმავლობაში არ ჰქონდათ ნათამაშები და მოედანს მონატრებულები ისე თამაშობდნენ, როგორც მოესურვებოდათ. დრო გავიდა და ემოციური ფონი დაითრგუნა, სეტიენი თავის თავს დაუბრუნდა და გუნდმაც ძველებურად დაიწყო თამაში. სეტიენის “ბარსას” შემხედვარე, ყოველთვის რჩება შთაბეჭდილება, რომ გუნდი ვარჯიშზეა და “ბურთის დაჭერას” თამაშობს, სადაც მეტოქის კარი უბრალოდ არ არსებობს და მთავარი მიზანი, არა გოლის გატანა, არამედ ბევრი პასის გაკეთებაა.

ეს მაშინ, როცა გვარდიოლას მთავარი გზავნილი ფეხბურთელებისადმი, “ბარსელონაში” ყოფნის დროს, იყო შემდეგი – “რაც შეიძლება სწრაფად მიიტანეთ ბურთი, მეტოქის კარამდე.” – თუ ტიერი ანრის დავუჯერებთ, ეს იყო პეპის მთავარი მოთხოვნა. ანუ, აბსოლუტურად საპირისპირო იმისგან, რასაც სეტიენი აკეთებს.

მიუხედავად ამისა, ორივეზე ამბობენ, რომ კრუიფის ფილოსოფიის მიმდევარნი არიან. ვინ როგორ მისდევს ამ ფილოსოფიას, გულშემატკივარმა განსაჯოს.

ტერ შტეგენი

“ბარსას” საშინელი ფეხბურთის გადამკიდე, ტერ შტეგენი გუნდის მთავარ ვარსკვლავად ყალიბდება, გერმანელმა კარი მშრალად შეინახა და ვერ ვიტყვით, რომ ამაში მცველების წვლილი დიდი იყო.

“სანჩეს პისხუანზე” ტერ შტეგენმა ოთხი რთული ბურთი მოიგერია, ისევე, როგორც “ბორუსიასთან”, “ატლეტიკოსთან”, “სლავიასთან” და “ნაპოლისთან”.

თავდაჯერება არასდროს აკლდა, ამ პერიოდში კი ლიდერის თვისებებიც ჩამოუყალიბდა. ვინ იცის, იქნებ “ბარსას” მომავალ კაპიტანს ვადევნებთ თვალყურს?!

გასვლითი თამაშები

როცა “ბარსა” გასვლითი თამაშების მოგებას ვერ ახერხებს, ეს ნიშნავს იმას, რომ გუნდში ფსიქოლოგიური პრობლემებია. ასე იყო რაიკაარდის დროს და ასეა ახლაც, არაფერი შეცვლილა. გარედანაც ჩანს, რომ შიდა სამზარეულოში, ყველაფერი რიგზე ვერ არის, ფეხბურთის დაბრუნების სიხარული მინელდა და პრობლემები ისევ ხილული გახდა.

“ბარსამ” გასვლით შეხვედრებში, 23 ქულა დაკარგა. ერნესტო ვალვერდეს ხელში, 3 წაგება და 3 ფრე ჰქონდათ ანგარიშზე, სეტიენის ხელში, ჯერჯერობით, 2 წაგება და 1 ფრე ფიქსირდება, თუმცა სეტიენს, ყველაფერი წინ აქვს, ის მხოლოდ ვალვერდეს თუ შეეჯიბრება, თორემ გვარდიოლასა და ლუის ენრიკესგან, ძალიან ძალიან შორს არის.

მესი

არასდროს ყოფილა “ბარსა” მესიზე ისე დამოკიდებული, როგორც ბოლო პერიოდში, ეს დამოკიდებულება ვალვერდეს პერიოდში დაიწყო და დღემდე გრძელდება, გუნდს არაფერი შეუძლია მესის გარეშე.

ამ მიზეზის გამო, მესის დაჭერაც გაცილებით მარტივი ხდება, მეტოქის მთელი გუნდი მის შეჩერებაზეა ორიენტრირებული, მათ არ ეშინიათ არც ახალ დაბრუნებული სუარესის, მით უმეტეს არც გრიზმანის და არც ბრეითუეიტს სჭირდება განსაკუთრებული ყურადღება. იმის მაგივრად, რომ “ბარსას” ფორვარდები და არა მხოლოდ ფორვარდები, მესის მიმართ განსაკუთრებული მეურვეობით სარგებლობდნენ, ყოველთვის პირიქით ხდება, ისევ მესი თუ მოიფიქრებს რამეს, ამაზე მისი გატანილი 21 გოლიც მეტყველებს.

აკადემია

სეტიენი ვერც ახალგაზრდებთან მიმართებაში ჩამოყალიბდა, მოსვლისთანავე ყველა აითვალწუნა, პაუზის მერე სიტუაცია შეიცვალა და მცირე დრო დაუთმო, მაგრამ ბოლო შეხვედრაში გამოჩნდა, რომ მაინც უჭირს ახალგაზრდების ნდობა.