ხავიერ ტებასი: რონალდუს წასვლას ლა ლიგაზე გავლენა თითქმის არ ჰქონია, თუმცა მესის შემთხვევაში განსხვავებული ვითარებაა

RAC1-თან საუბრისას ხავიერ ტებასმა, ლეო მესის კარიერის დასრულებაზე და ამ მოვლენის ლა ლიგასთან კავშირზე ისაუბრა.

ლა ლიგის პრეზიდენტის აზრით, ლეოს წასვლას ჩემპიონატზე დიდი გავლენა ექნება, რაც რონალდოს შემთხვევაში არ მომხდარა.

“მიუხედავად იმისა, რომ მადრიდში რონალდუს წასვლა ძალიან არ ესიამოვნათ, ამ ფაქტს ლა ლიგაზე თითქმის არანაირი გავლენა არ ჰქონია. ჩვენ წლების განმავლობაში ვმუშაობდით იმისთვის, რომ ლა ლიგა, როგორც ბრენდი, ცალკეულ ფეხბურთელებზე მაღლა დაგვეყენებინა.”

“თუმცა, მესის შემთხვევა განსხვავებულია. ლეო ფეხბურთის ისტორიაში საუკეთესოა და ჩვენ ძალიან გაგვიმართლა, რომ მთელი კარიერა ლა ლიგაში გაატარა. ვფიქრობ არგენტინელის წასვლა ნამდვილად შესამჩნევი იქნება.”

“ის ესპანური ფეხბურთის, ლა ლიგის, სახეა და მე აუცილებლად ვთხოვ, რომ კარიერა ჩვენთან დაასრულოს. ჩვენ სატელევიზიო კონტრაქტები მესისთან ერთადაც და მის გარეშეც გაგვიფორმებია, მაგრამ ყველაზე ძვირფასი ის სანახაობაა, რომელსაც ლეო გვჩუქნის. ის თითოეულს კმაყოფილების გრძნობას ანიჭებს.”

ამ სეზონში ტრავმის გამო ორთვიანი უქმობის მიუხედავად, არგენტინელმა 33 შეხვედრაში 26-ჯერ მოახერხა მეტოქე გუნდების კარის აღება. კრიშტიანუს ანგარიშზე კი 34 შეხვედრაში 25 გოლია.

რაც შეეხება ლეოს სხვა გუნდში გადასვლას, ძნელი წარმოსადგენია, ის სხვა გუნდში ან ჩემპიონატში ვიხილოთ. Mundo Deportivo-ს ცნობით, კატალონიური გუნდის ხელმძღვანელობა მესის ახალ კონტრაქტს უმზადებს, რომლის მიხესვითაც ის “კამპ ნოუზე” კიდევ 2 წლით დარჩება.