ხავიერ ტებასი: ბარსას ფინანსების კიდევ უფრო გაუმჯობესების რესურსი აქვს

ლა ლიგამ ესპანეთის პროფესიული ფეხბურთის განახლებული სახელფასო ლიმიტები წარადგინა. “ბარსელონას” ხარჯვის ჭერი გასული ზამთრის სატრანსფერო ფანჯრის 432 მილიონიდან მიმდინარე 582.769 მილიონ ევრომდე გაიზარდა. ლა ლიგის პრეზიდენტმა ხავიერ ტებასმა და ორგანიზაციის გენერალურმა კორპორაციულმა დირექტორმა ხავიერ გომესმა დეტალურად განმარტეს, თუ როგორ შეძლო კატალონიურმა კლუბმა ამ შედეგის მიღწევა.

ტებასმა ხაზგასმით აღნიშნა, რომ მხოლოდ ვალზე საუბარი არასწორია და მთავარი შემოსავლების გენერირების უნარია:

“ხშირად ვკითხულობ ხოლმე, რომ ‘ბარსელონას’ ამდენი და ამდენი მილიონის ვალი აქვს. მთავარი მაინც შემოსავლები და ვალის დაფარვის რეალური უნარია. ამ სიტუაციას სწორად უნდა შევხედოთ.

‘ბარსელონას’ შემოსავალი უკვე მილიარდ ევროს შეადგენს. კლუბს აქვს გადახდისუნარიანობა და პირობების კიდევ უფრო გაუმჯობესების რესურსი.”

რატომ გაიზარდა სახელფასო ლიმიტი

ხავიერ გომესმა დაწვრილებით ახსნა ფინანსური მექანიზმები, რომლებმაც ლიმიტის მკვეთრი ზრდა განაპირობა:

“ბარსელონა” რთული მდგომარეობიდან მოდიოდა. ლიმიტი გაიზარდა, რადგან მათ აქვთ მეტი შემოსავალი, სტრუქტურული ხარჯები კი ოპტიმიზებულია. კლუბმა წინა წლების ზარალის ნაწილი აანაზღაურა, რამაც ჭერის აწევა გამოიწვია.

წლების განმავლობაში მათ შეზღუდვები ჰქონდათ დაწესებული, ახლა კი ზარალი ამოიღეს, გაზარდეს კომერციული შემოსავლები და ფეხბურთელების ტრანსფერებიდან მიღებული თანხები. სწორედ ამან გაზარდა მათი ზღვარი.”

1:1 წესი და მონჟუიკის ეფექტი

გომესმა ოფიციალურად დაადასტურა, რომ სატრანსფერო ბაზარზე “ბარსელონა” 1:1 წესით ოპერირებს და გამორიცხა საფრთხე, რომ სარემონტო სამუშაოების გამო “მონჟუიკზე” დროებით თამაში კლუბის ეკონომიკას დააზარალებს:

“მონჟუიკზე” ბილეთების გაყიდვების მაჩვენებლები ძალიან მაღალია. გარდა ამისა, არის სხვა შემოსავლებიც და გარკვეული ხარჯების აქტივაცია, რაც ჯერ არ ამოქმედებულა. ცხადია, განახლებულ სტადიონზე ვითარება გაცილებით უკეთესი იქნება და ისინი ამ ვითარებას გეგმაზომიერად უმკლავდებიან.”