ტრინკაუს შეუძლია, ანდრეს ინიესტას ან ჩავის როლი მოირგოს – აბელ ფერეირა

“ბრაგას” ყოფილი და ბერძნული პაოკ-ის ამჟამინდელი მთავარი მწვრთნელი, აბელ ფერეირა “ბარსელონას” საკუთრებაში მყოფ ფრანსიშკუ ტრინკაუზე საუბრობს.

“ტრინკაუ ტიპური გარემარბი და ისეთი ფეხბურთელი არ არის, რომელიც ყოველ მატჩში გუნდთან ახლოს იმყოფება. მას ბურთის მარჯვენა ფლანგზე მიღება და ცენტრში შეწევა უყვარს, რადგან ცაციაა. ფრანსიშკუ ხაზებს შორის კარგად თამაშობს.

არ ველით, რომ პორტუგალიელი მთელ სტადიონზე ირბენს, მაგრამ ის ახალგაზრდა მოთამაშეა, რომელსაც თამაში კარგად ესმის. მისი გამოყენება 4-4-2, 3-4-3 და 4-3-3 ფორმაციებშია შესაძლებელი.

ტრინკაუმ, შესაძლოა, 4-3-3-ში ანდრეს ინიესტას ან ჩავის როლი მოირგოს. მას მოედნის ცენტრში სივრცეების ათვისება იდეალურად შეუძლია. პორტუგალიელი ამას “ბრაგა ბ-ში” აკეთებდა, შემდგომ კი პირველ გუნდშიც გააგრძელა.

ფრანსიშკუს განვითარება სათანადო შანსების მიცემაზე იქნება დამოკიდებული. მისი ასაკის გათვალსიწინებით, პორტუგალიელს შესაძლებლობების მიღება სჭირდება, რაც მნიშვნელოვანი ფაქტორია, განსაკუთრებით, ისეთ კლუბში, როგორიც “ბარსელონაა”.

იქ, სადაც ლეო მესი, ანტუან გრიზმანი და ფრენკი დე იონგი ასპარეზობენ, შესაძლოა, ფრანსიშკუს მეტი დრო დასჭირდეს, მაგრამ თუ ის წინასასეზონო ტურნეზე პირველ გუნდთან ერთად მოგვევლინება, ყველასთვის სიურპრიზი იქნება”, – ციტირებს სპეციალისტის სიტყვებს Sport.

მიმდინარე სეზონში 20 წლის შემტევმა, “ბრაგას” მაისურით ჩატარებულ ბოლო 11 შეხვედრაში, თავი 7 გოლითა და 3 ასისტით გამოიჩინა. “ბარსამ” ტრინკაუ, რომელიც კლუბს მომდევნო სეზონში შეუერთდება, გასული ზამთრის სატრანსფერო ფანჯარაზე 31 მილიონ ევროდ შეიძინა.