“ჩელსი” პედრო როდრიგესს ახალ კონტრაქტს აღარ შესთავაზებს

Telegraph-ის საკმაოდ გამოცდილი და უშუალოდ “ჩელსისთან” დაკავშირებულ სიახლეებზე მომუშავე ჟურნალისტი, მეთ ლოუ, ირწმუნება, რომ ეს სეზონი ესპანელი ნახევარმცველისთვის “”ლურჯების”” რიგებში ბოლო იქნება.

სხვადასხვა ჭორების თანახმად, “ლა მასიის” აღზრდილ ფეხბურთელს ამერიკაში გამგზავრება და იქ თამაში აქვს გადაწყვეტილი.

მაურიციო სარის მწვრთნელობის დროს პედროს გაცილებით დიდი როლი და მეტი სათამაშო დრო ჰქონდა, ფრენკ ლემპარდის მოსვლის შემდეგ კი ეს ყველაფერი უარესობისკენ შეიცვალა.

მიმდინარე სეზონში ესპანელმა მხოლოდ 18 მატჩში მიიღო მონაწილეობა, აქტივში კი 2 გოლი და 3 ასისტი მიითვალა. მიუხედავად ამ არცთუ შედეგიანი სტატისტიკისა, მან “ლივერპულთან” და “ევერტონთან” გამართულ უკანასკნელ შეხვედრებში თავი საკმაოდ შთამბეჭდავად წარმოაჩინა.

2010 წელს მსოფლიოს ტრიუმფატორი ესპანეთის ნაკრების წევრობის გარდა, პედრომ “ბარსელონასთან” ერთად ლა ლიგის 5 და ჩემპიონთა ლიგის 3 ტიტული მოიპოვა. 2015 წელს კი კატალონიური კლუბიდან “ჩელსის” შეუერთდა.

“ლა მასიაში” გატარებული დროის ჩათვლით პედრო “ბარსელონაში” 11 წელი თამაშობდა, მან ლა ლიგის 204 შეხვედრაში მიიღო მონაწილეობა და ყველა ტურნირზე ჯამში 99 გოლი გაიტანა.

“ბარსას” ყოფილმა ფეხბურთელმა L’Esportiu-სთან ადრე მიცემულ ინტერვიუში აღნიშნა, რომ ის ბედნიერი იქნებოდა “კამპ ნოუზე” დაბრუნებით, იმ შემთხვევაში თუ კატალონიელები მისით კვლავ დაინტერესდებოდნენ.