როგორ ჩაშალა “მანჩესტერმა” როდრიგოს “ვალენსიადან” “ბარსელონაში” ტრანსფერი

“ვალენსიას” თავდამსხმელი როდრიგო მორენო “ბარსელონაში” გადასვლასთან ახლოს იყო, მაგრამ ბოლო მომენტში ტრანსფერი “მანჩესტერ იუნაიტედმა” ჩაშალა.

როგორ? შევეცდებით მოლაპარაკებების მიმდინარეობაში მარტივად გაგარკვიოთ:

• “ბარსელონას” როდრიგოს 6 თვით იჯარით აყვანა სურდა, “ვალენსიას” კი უნდოდა კატალონიელებს ფეხბურთელის სეზონის ბოლოს გამოსყიდვის ვალდებულება აეღოთ;
• “ბარსელონამ”, “ვალენსიას” დასაყოლიებლად, “ღამურებს” ტრანსფერში მუსა ვაგეს, აბელ რუისის ან კარლეს პერესის ჩართვა შესთავაზა;
• “ვალენსიამ” სამივე ფეხბურთელი დაიწუნა და ტრანსფერში ნელსონ სემედუს ჩართვა მოითხოვა, რაზეც უარი მიიღო;
• ამის შემდეგ, გამოსავალი როდრიგოსა და სემედუს აგენტმა, ჟორჟე მენდეშმა მონახა, რომელაც კლუბებს ასეთ ფორმულა შესთავაზა: “ბარსელონა” მენდეშის კიდევ ერთ კლიენტს, ბრუნო ფერნანდეშს “სპორტინგიდან” შეიძენდა და მას “ვალენსიაში” გაანათხოვრებდა, სანაცვლოდ კი როდრიგოს იჯარით აიყვანდა. ეს სქემა ყველასთვის მომგებიანი იყო, მაგრამ…
• ბრუნო ფერნანდეშით დაინტერესებული იყო “მანჩესტერ იუნაიტედიც”. მას შემდეგ, რაც პორტუგალიელი შემტევი ნახევარმცველისთვის ბრძოლაში “ბარსელონა” ჩაერთო, “წითელი ეშმაკები” გააქტიურდნენ, ფასი გაზარდეს და საბოლოოდ, ფეხბურთელი მათ დარჩათ. დაახლოებით 2 საათის წინ, ინგლისელებმა “სპორტინგთან” შეთანხმება ოფიციალურად დაადასტურეს;
• ვინაიდან “ბარსელონა” ბრუნო ფერნანდეშის ყიდვას ვეღარ ახერხებს, მას “ვალენსიას” მოთხოვნების დაკმაყოფილება აღარ შეუძლია და როდრიგოს ტრანსფერიც ჩაიშალა.