“ბარსელონას” მორიგი მარცხი სტუმრად: 3 გოლი 7 წუთში და 1-3 “ლევანტესთან”

ერთი შეხედვით, “ბარსელონამ” სეზონის სტარტზე დაწყებული სტუმრად ცუდი თამაშის სერია “ხეტაფესთან” და “ეიბართან” გამარჯვების შემდეგ დაასრულა, მაგრამ გამოჩნდა, რომ გუნდს სასურველ ფორმამდე ისევ ბევრი უკლია. 

კატალონიელები “ლევანტესთან” 1-3 დამარცხდნენ. ეს ერნესტო ვალვერდეს გუნდის მე-3 წაგება იყო 11 მატჩში და დიდი ალბათობით, ქულების დაკარგვა “ბარსას” ლიდერობის დაკარგვადაც დაუჯდება – ამ ტურში, მადრიდის “რეალს”, რომელიც “ბარსელონას” მხოლოდ ერთი ქულით ჩამორჩება, თავისი მატჩი ჯერ არ ჩაუტარებია. 

“ბარსელონამ” პირველი ტაიმი ლიონელ მესის მიერ 38-ე წუთზე გატანილი გოლით მოიგო, 61-ე და 63-ე წუთებზე “ლევანტემ” ორი ბურთი შეაგდო და დაწინაურდა, მალევე კი ვალენსიელებმა სხვაობა კიდევ უფრო გაზარდეს. კატალონიური გუნდი მე-12 ტურში “სელტას” უმასპინძლებს, იქამდე კი, 5 ნოემბერს, ჩემპიონთა ლიგაზე “სლავიას” დაუპირისპირდება, რომელმაც წინა ტურში “ბარსას” სერიოზული პრობლემები შეუქმნა.