როგორ წარიმართება დემბელეს „ბარსელონური“ კარიერა?

უსმან დემბელეს სახელი ყოველთვის იწვევს ცხარე დებატებსა და აზრთა სხვადასხვაობას. ფრანგი გარემარბი “ბარსელონას” ნეიმარის მოულოდნელი ტრანსფერის შემდეგ შეუერთდა. დასაწყისში, კატალონიურ გრანდს კოუტინიოს გაფორმება სურდა (რომელიც “კამპ ნოუზე” რამდენიმე თვის შემდეგ მაინც გადაბარგდა). “ლივერპულთან” მოლაპარაკებამ უშედეგოდ ჩაიარა, ამ ყველაფერმა კი ესპანეთის ჩემპიონებს ფრანგ ფორვარდში იმაზე მეტის გადახდა აიძულა, ვიდრე აპირებდნენ.

“ბარსელონური” კარიერის სასურველად დაწყებაში დემბელეს ხელი ტრავმებმა შეუშალეს. მეორე სეზონი მისთვის შედარებით სანახაობრივი აღმოჩნდა, მაგრამ ეს წარმატება მოედნის მიღმა არსებული პრობლემებით დაიფარა. დაზიანებები არსად გამქრალა, მაგრამ უსმანის არაპროფესიონალური ქმედებები უფრო დიდ აღშფოთებას იწვევდა მის თანაგუნდელებსა და ქომაგებს შორის.

ახალგაზრდა ფეხბურთელისთვის მარტივი გადასალახი არც ეს ზაფხული ყოფილა. მის სახელს ნეიმარის სატრანსფერო საგას აქტიურად უკავშირებდნენ. პრე-სეზონის შეხვედრებში უსმანი დემბელესთან ერთად უფრო ეფექტურად და ბედნიერად გამოიყურებოდა. ამიტომ, ეს აუცილებლად უნდა ყოფილიყო “მისი წელი”.

პოზიტივი გაქრა “ატლეტიკთან” გამართული შეხვედრის შემდეგ, სადაც გუნდი 0:1 დამარცხდა. დემბელე მატჩის დასრულებისას დისკომფორტს განიცდიდა, მაგრამ მას ამის შესახებ არავისთვის უთქვამს. ფრანგმა ოჯახთან გამგზავრების ნებართვა მიიღო, დაბრუნების შემდეგ კი მისი ტრავმა ოფიციალურად დადასტურდა.

ამ ყოველივემ დემბელეს პროფესიონალიზმის ირგვლივ კითხვის ნიშნები დასვა. მან სამედიცინო პერსონალი ტკივილის შესახებ არ გააფრთხილა. სწორედ ამიტომ, ფანები განსაკუთრებულად უკმაყოფილონი არ დარჩნენ, როცა მისი ნეიმარის ტრანსფერში ჩართვის შესახებ ინფორმაცია გავრცელდა.

ახლა, როცა ბრაზილიელი ფორვარდის ტრანსფერი ჩაიშალა, დემბელე მეოთხე ფორვარდის რანგშია. ანსუ ფატიმ და კარლეს პერესმა თავიანთი შანსები სრულყოფილად გამოიყენეს, რაც კიდევ უფრო ართულებს ფრანგი გარემარბის მდგომარეობას. საინტერესო ისაა, თუ როგორ მიუდგება აღნიშნულ ვითარებას დემბელე და გამოიყენებს თუ არა კონკურენციას მისთვის სასარგებლოდ.

დემბელე დიდი ალბათობით კვლავ სასტარტო თერთმეტეულს მიღმა დარჩება, როცა “ბარსელონას” საკადრო პრობლემა მოგვარდება. მას ძირითად შემადგენლობაში ადგილის მოპოვებისთვის ბრძოლა მოუწევს.