“ბარსელონას” მხოლოდ ერთი ტრანსფერით შეუძლია გახდეს უძლეველი

“ბლაუგრანას” შემადგენლობა უფრო და უფრო ძლიერდება. გთავაზობთ მცირე ანალიტიკურ განხილვას.

ალბათ ბევრი საუბარი არ სჭირდება იმას, რომ დღესდღეობით “ბარსელონას” მსოფლიოში ერთ-ერთი საუკეთესო გუნდი ჰყავს. თუმცა, მცირე დისბალანსი ჯერ კიდევ რჩება. პირდაპირი შემცვლელი არ ჰყავს ჟორდი ალბას, აგრეთვე, შეუცვლელ მოთამაშეებად რჩებიან საკვანძო ფიგურები: ჟერარ პიკე, სერხიო ბუსკეტსი და ლუის სუარესი.

პრობლემების უმეტესობა ზაფხულში მოგვარდება. როგორც ვიცით, უკვე შეთანხმებულია ფრენკი დე იონგისა და ჟან-კლერ ტოდიბოს ტრანსფერი. ასევე, გუნდში დაბრუნდება “ეიბარში” განათხოვრებული მარცხენა მცველი მარკ კუკურელა. თუმცა, გადაუწყვეტელი რჩება ლუის სუარესის დუბლიორის საკითხი.

“ბლაუგრანას” რიგებს სრულად დატოვებენ ანდრე გომეში, დენის სუარესი, რაფინია და არდა თურანი. პირველ გუნდში კი დაწინაურდება “ლა მასიას” წარმატებული აღზრდილი რიკი პუჩი. სწორედ აკადემიის ფეხბურთელები შეავსებენ იმ სიცარიელეებს, რომლის შევსებაც ტრანსფერებით ვერ ხერხდება.

როგორც უკვე აღვნიშნეთ, ცენტრ-ფორვარდის პოზიციაზე ჯერჯერობით სიახლე არ არის. გასულ ზაფხულს “ბარსა” მადრიდის “ატლეტიკოს” ვარსკვლავის, ანტუან გრიზმანის გადაბირებას ცდილობდა, მაგრამ პროცესი უშედეგოდ დასრულდა.

იმისათვის, რომ “ბარსელონა” უძლეველ გუნდად ჩამოყალიბდეს, საჭიროა სწორი თავდამსხმელის შეძენა, რომელსაც ექნება პოტენციალი, გახდეს საუკეთესო და ლუის სუარესის მემკვიდრეობა წარმატებით გადაიბაროს. ამის შემდეგ გუნდი გახდება სტაბილური და ფაქტობრივად შეუჩერებელი.