ანტონიო რიუდიგერი: შევეცდებით, “ბარსელონას” კატა-თაგვობანა ვეთამაშოთ

ლონდონის “ჩელსის” მცველი ანტონიო რიუდიგერი “ბარსელონასთან” გასამართი დაპირისპირების წინ აცხადებს, რომ მის გუნდს კატალონიელების არ ეშინია.

“ფსიქოლოგიური მდგომარეობა შესანიშნავია. შეხედეთ “რეალს” – ამ გუნდს, ესპანეთის ჩემპიონატში, საქმე კარგად არ მისდის, მაგრამ ჩემპიონთა ლიგაზე, პსჟ-ს წინააღმდეგ, ძალიან კარგად ითამაშა. ეს სხვა ტურნირია. აქ 2 კონკრეტული თამაშია მნიშვნელოვანი. ჩვენთვის, ეს შანსია, ყველაფერი სწორად გავაკეთოთ და ეს შანსი უნდა გამოვიყენოთ. ყველაფერი ჩვენზეა დამოკიდებული. ყველამ იცის, როგორ უყვარს “ბარსელონას” ბურთის კონტროლი. ჩვენ კი შევეცდებით, კატალონიელებს კატა-თაგვობანა ვეთამაშოთ.

თამაში 90 წუთის განმავლობაში, საფეხბურთო მოედანზე მიმდინარეობს და არ აქვს მნიშვნელობა, რა ხდებოდა მის დაწყებამდე. თუ ვინმეს ეშინია, დაე, ნუ ითამაშებს. “ბარსელონას” პატივს ვცემ, მაგრამ როგორც კი არბიტრის სასტვენი გაისმება, მოგებისთვის ყველაფერს გავაკეთებ.

მთელი გუნდი სრულად კონცენტრირებული უნდა იყოს. უნდა გავერთიანდეთ, ვიბრძოლოთ და გავიმარჯვოთ. ეს იქნება უმაღლესი დონის შეხვედრა ორ კარგ გუნდს შორის. პრობლემები მეტოქესაც შეექმნება, რადგან ჩვენ ისეთი მოთამაშეები გვყავს, როგორებიც აზარი, ჟირუ, მორატა და ფაბრეგასი არიან. თუმცა, მოედანზე 11 ფეხბურთელისგან შემდგარი გუნდი გადის და ყველაზე უნდა ვიფიქროთ. იგივე ეხება “ბარსელონასაც.” – ციტირებს 24 წლის ფეხბურთელის სიტყვებს Goal.