სანამ სრულიად საფეხბურთო სამყარო უსმან დემბელეს ტრანსფერის ოფიციალურ დადასტურებას ელის, კატალონიელები უკვე გეგმავენ ახალგაზრდა ფრანგის განრიგს. შესაძლოა ფეხბურთელი, რომელიც კატალონიელებს 105 მილიონს +40 მილიონი (ბონუსების სახით) დაუჯდებათ, კვირას უკვე ესპანეთში გაემგზავროს.
პრეზენტაცია ორშაბათისთვისაა დაგეგმილი, თუმცა ჯერ ზუსტი დრო უცნობია. სამედიცინო შემოწმებას დემბელე “ბარსელონას” საავადმყოფოში ადგილობრივი დროით 8 საათზე გაივლის. აღსანიშნავია, რომ ნელსონ სემედუმ და პაულინიომაც ეს ტესტი ამავე საავადმყოფოში გაიარეს.
“კამპ ნოუ” გულშემატკივრებისთვის ღია იქნება, რომლებიც საკუთარი თვალით იხილავენ, თუ როგორ აიხდინა დემბელემ ოცნება. მისი დებიუტი 9 სექტემბერს “ესპანიოლის” წინააღმდეგ შედგება, 3 დღის შემდეგ კი “ბარსელონას” მაისურს ჩემპიონთა ლიგაზე, “იუვენტუსის” წინააღმდეგ მატჩშიც მოირგებს.
