მუხიკა მეხუთეა, ჭანტურია – პირველი

“ბარსელონა ბ”-ს 17 წლის მოთამაშე რაფა მუხიკა მე-5 ყველაზე ახალგაზრდა ფეხბურთელია, რომელმაც, 21-ე საუკუნეში, კატალონიელთა პირველი გუნდის მაისურით გოლის გატანა მოახერხა. ყველაზე ახალგაზრდა მოთამაშე კი ქართველია…

მუხიკამ მონაწილეობა “ბარსელონას” მიერ მიმდინარე ზაფხულში გამართულ ორივე ამხანაგურ მატჩში მიიღო. “სელტიკის” წინააღმდეგ მატჩში მან მოედანზე 30 წუთი დაჰყო, “ლესტერთან” კი – 13.

ინგლისის ჩემპიონ გუნდთან დაპირისპირებაში, მუხიკამ გოლი მოედანზე შესვლიდან 5 წუთში გაიტანა. ამ დროს, ის 17 წლის, 9 თვისა და 4 დღის იყო.

21-ე საუკუნეში, “ბარსელონას” პირველი გუნდის მაისურით ამაზე ახალგაზრდა ასაკში გოლი მხოლოდ ოთხ ფეხბურთელს გაუტანია. მათგან ყველაზე ახალგაზრდა გიორგი ჭანტურიაა.

ქართველმა ფეხბურთელმა, რომელიც “ბარსელონას” აკადემიაში ირიცხებოდა, 2009 წლის 18 ნოემბერს, “ბოლივართან” გამართულ ამხანაგურ შეხვედრაში ითამაშა. მატჩი, რომელიც “ბარსელონას” საწვრთნელ ბაზაზე გაიმართა, კატალონიელებმა 4:1 მოიგეს, ჭანტურიამ კი თავი თერთმეტმეტრიანი დარტყმით გამოიჩინა. იმ დროს ის მხოლოდ 16 წლის, 7 თვისა და 7 დღის იყო.

ჭანტურიას შემდეგ ყველაზე ახალგაზრდა ფეხბურთელები, რომლებმაც 21-ე საუკუნეში გოლი პირველი გუნდის მაისურით გაიტანეს, არიან: ბოიან კრკიჩი (16 წლის, 7 თვის, 25 დღის), ლიონელ მესი (17 წლის, 25 დღის), ჯოვანი დოს სანტოსი (17 წლის, 2 თვის, 17 დღის), რაფა მუხიკა (17 წლის, 9 თვის, 4 დღის).