კუგელის მეთოდი ბარსელონას გარდაქმნის

46 წლის ბენიამინ კუგელი “ბარსელონაში” მიმდინარე წლის ზაფხულში ჰანსი ფლიკის პირადი მოთხოვნით მივიდა. გერმანელ სპეციალისტს ფიზიკური მომზადების მიმართულებით ახალი მიდგომა სურდა – სფეროში, სადაც მას წინა პასუხისმგებელ პირთან, ხულიო ტოუსთან არაერთი უთანხმოება ჰქონდა. საქმე იქამდეც მივიდა, რომ ფლიკი მას საჯაროდაც დაუპირისპირდა და პირველ გუნდში მისი უფლებამოსილებები შეზღუდა. ურთიერთობა იმდენად დაიძაბა, რომ მთავარმა მწვრთნელმა ფაქტობრივად ულტიმატუმი წამოაყენა და წინასასეზონო შეკრების დაწყებამდე საკითხის გადაუჭრელობის შემთხვევაში წასვლით დაიმუქრა.

კლუბის ხელმძღვანელობამ რეალობის შელამაზება სცადა და ტოუსი “შედეგების ოპტიმიზაციის ახალ დეპარტამენტში” გადაიყვანა, რომელსაც დღეს პირველ გუნდთან არანაირი შეხება აღარ აქვს. საიდუმლო არავისთვისაა, რომ ეს კლასიკური “ზევით დაწინაურება” იყო, რათა კონტრაქტით გათვალისწინებული სოლიდური კომპენსაციის გადახდა აერიდებინათ თავიდან.

კუგელს ადაპტაციის პრობლემა საერთოდ არ შექმნია: ჯერ ერთი, თავის თანამემამულე ფლიკს შესანიშნავად იცნობს (მასთან გერმანიის ნაკრებში მუშაობდა), მეორეც – საკმაოდ კარგად ფლობს ესპანურ ენას, რადგან სტუდენტობისას რამდენიმე წელი კოსტა-რიკაში ცხოვრობდა.

კუგელის მეთოდოლოგია

მისი სამუშაო სტილი ფეხბურთელისგან მაქსიმალური ფიზიკური რესურსის მიღებას ეფუძნება, რაც თითოეული მოთამაშის მოთხოვნებსა და საჭიროებებზე მორგებული მკაფიო რუტინით მიიღწევა.

• ძალისმიერი ვარჯიშები: უმეტეს შემთხვევაში მან დარბაზში ელასტიკური რეზინებისა და ქამრების გამოყენებაზე უარი თქვა და ჰანტელებით ვარჯიშის პრაქტიკა დააბრუნა. მხოლოდ რამდენიმე ფეხბურთელი, მაგალითად პედრი ინარჩუნებს ქამრების რუტინას, რადგან მის შემთხვევაში ამან კარგი შედეგი გამოიღო, თუმცა ეს ერთ-ერთი იშვიათი გამონაკლისია.
• მატჩისშემდგომი აღდგენა: დაინერგა შეხვედრის შემდგომი აღდგენითი სისტემა. ყველა ფეხბურთელი – როგორც ძირითადის მოთამაშეები, ისე სათადარიგოები, სათამაშო წუთების გათვალისწინებით ძალისმიერ სავარჯიშოებს ასრულებს (ბუნებრივია, სათადარიგოებისთვის ინტენსივობა გაცილებით მაღალია).
• პირადი ჩართულობა: ეს ერთ-ერთი უმთავრესი განსხვავებაა ტოუსთან, რომელიც ვარჯიშებზე კვირაში მხოლოდ ერთხელ ან ორჯერ ჩნდებოდა და საქმეს თანაშემწეებს ანდობდა. მეტიც, ტოუსი გუნდთან ერთად გასვლით მატჩებზე არასდროს მოგზაურობდა და “კამპ ნოუზეც” მხოლოდ ეპიზოდურად მიდიოდა. კუგელი კი დღემდე ყველა მატჩს ესწრება – როგორც შინ, ისე გასვლაზე და დაგეგმვასა თუ მითითებებში აქტიურად არის ჩართული.
• კავშირი სამედიცინო შტაბთან: გაიზარდა კავშირი სამწვრთნელო შტაბის სხვა წევრებთან, განსაკუთრებით რიკარდ პრუნას ხელმძღვანელობით მოქმედ სამედიცინო პერსონალთან. კვირაში ერთხელ იმართება შეხვედრები მონაცემთა გასაანალიზებლად, რათა ფეხბურთელების გადაწვა გამოირიცხოს და დატვირთვები სწორად გადანაწილდეს.

კუგელს თავისი ფეხბურთელების შესახებ ყველაფრის ცოდნა სურს: ცდილობს მუდმივი დიალოგი ჰქონდეს თითოეულთან, რათა მათი ფიზიკური და ემოციური მდგომარეობა სწორად შეაფასოს – მან კარგად იცის, რომ არის დღეები, როცა დარბაზში დატვირთვა უნდა გაიზარდოს და დღეები, როცა პირიქით, შემცირებაა საჭირო.

ეჭვგარეშეა, რომ გერმანელი სპეციალისტი გასახდელში იდეალურად შევიდა. ფეხბურთელები გრძნობენ, რომ მოედანზე “დაფრინავენ”, გუნდი კი მეტოქეებს ფიზიკურად ანადგურებს. ფლიკისა და კუგელის მთავარი გამოწვევა ამ ინტენსივობის მთელი სეზონის განმავლობაში შენარჩუნება იქნება. ამ ეტაპზე გუნდი ფიზიკური ძალის ნამდვილ სანახაობას წარმოადგენს, გასახდელიდან კი ირწმუნებიან, რომ “ბარსელონას” ამჟამინდელი მდგომარეობა თავისი რეალური პოტენციალის 70 პროცენტს არ აჭარბებს – პიკი ოქტომბრიდან იგეგმება. ახლა მხოლოდ პოპკორნის მომარაგება, დივანზე მოკალათება და სიამოვნების მიღებაღა რჩება.