კრისტენსენის უქმობა შესაძლოა ორ თვემდე გახანგრძლივდეს

ფეხბურთელი, განსაკუთრებით კი ისეთი, ვისაც ტრავმების მდიდარი გამოცდილება აქვს, სამედიცინო დასკვნის გამოქვეყნებამდეც პირველი გრძნობს დაზიანების სიმძიმეს. შაბათს, “სევილიასთან” მატჩში, “რამონ სანჩეს-პისხუანზე” ანდრეას კრისტენსენის ცრემლები სწორედ ამის მანიშნებელი იყო. 30 წლის დანიელმა ცენტრალურმა მცველმა იმავე წამს გააცნობიერა, რომ საქმე სერიოზულ დაზიანებას ეხებოდა. კვირას კატალონიურმა კლუბმა დიაგნოზი დააზუსტა – “მარცხენა ბარძაყის ოთხთავა კუნთის სწორი კუნთის დაზიანება”, თუმცა აღდგენის ზუსტი ვადების დასახელებისგან თავი შეიკავა. თავდაპირველი პროგნოზებით 4-დან 6 კვირამდე უქმობა ვარაუდობდნენ, მაგრამ Mundo Deportivo-ს მიერ გამოკითხული ფეხბურთელის გარემოცვის წყაროები შიშობენ, რომ ლაზარეთში გატარებული დრო საბოლოოდ ორ თვემდე გაიზრდება.

სანაკრებო პაუზა, რომელიც ამ სეზონიდან პირველად გახდა სამკვირიანი, ჰანსი ფლიკისთვის პრობლემას გარკვეულწილად ამსუბუქებს. გერმანელი სპეციალისტი ცენტრალური მცველების სიუხვით განებივრებული არ არის (პაუ კუბარსი და ჟერარ მარტინი), თუმცა დაცვის ცენტრში მას ერიკ გარსიასა და ჟიულ კუნდეს გამოყენება შეუძლია, რადგან ფლანგებზე საკმარისი ალტერნატივები აქვს: ჩავი ესპარტი და ჟოაუ კანსელუ ორივე ფრთაზე, ხოლო ალეხანდრო ბალდე – მარცხნივ. გარდა ამისა, წინასასეზონო მომზადებაზე წარმატებული გამოსვლის შემდეგ, მარჯვენა მცველად ბრიან ფარინიასის გადაწევაც შესაძლებელია.

ლა ლიგის მორიგი სანაკრებო პაუზა 7-8 ნოემბრის უქმეებზე გასამართ “ატლეტიკო”-“ბარსელონასა” და 21-22 ნოემბრის “ბარსელონა”-“ვილიარეალის” დაპირისპირებას შორის შედგება. სწორედ “ვილიარეალთან” მატჩი შეიძლება იქცეს კრისტენსენის დაბრუნების სამიზნედ, რათა რეაბილიტაციის პროცესი ნაჩქარევად არ წარიმართოს. ამ პერიოდში ის რვა შეხვედრას გამოტოვებს (ხუთს ლა ლიგაში და სამს ჩემპიონთა ლიგაზე), მათ შორის პსჟ-სთან მატჩსა და “ელ კლასიკოს”.