ბარსა ატლეტიკის ანომალია: განსხვავებული კაპიტანი ყოველ მატჩში

“ბარსა ატლეტიკმა” მიმდინარე სეზონში პირველი საგარეო გამარჯვება “ბარბასტროსთან” მოიპოვა. შვიდი ქულითა და გატანილ-გაშვებული ბურთების +6 სხვაობით სარეზერვო გუნდი სატურნირო ცხრილში მეორე ადგილს იკავებს და მხოლოდ “ოსასუნა B-ს” ჩამორჩება, რომელმაც სამივე შეხვედრა მოიგო. მატჩის დასრულების შემდეგ გუნდის მთავარმა მწვრთნელმა ჟულიანო ბელეტიმ საინტერესო ანომალიის შესახებ ისაუბრა: მიუხედავად იმისა, რომ დასახელებული კაპიტნები ერთდროულად იმყოფებოდნენ მოედანზე, გუნდს სამივე ტურში განსხვავებული კაპიტანი ჰყავდა.

შემადგენლობის დაკომპლექტების შემდეგ კლუბმა გამოაცხადა, რომ მიმდინარე სეზონში კაპიტნები იერარქიის მიხედვით იქნებოდნენ ლანდრი ფარე, ედერ ალიერი, გილიემ ვიქტორი და ალექს კამპოსი. მათგან სამმა უკვე მოირგო სამკლაური საწყის სამ შეხვედრაში: სასტარტო ტურში “ნახარასთან” კაპიტანი ლანდრი იყო, “ლოგრონიეს B-სთან” – კამპოსი, ხოლო “ბარბასტროსთან” – გილიემ ვიქტორი.

ჟულიანო ბელეტიმ თავისი გადაწყვეტილების ლოგიკა განმარტა და აღნიშნა, რომ ამას პასუხისმგებლობის გრძნობის გასაზრდელად აკეთებს:

“ოთხი კაპიტანი გვყავს, თუმცა წესრიგი და დისციპლინა მთელ გუნდს მოეთხოვება. კაპიტანს ყოველ კონკრეტულ მომენტში იმის მიხედვით ვნიშნავ, სად და ვის წინააღმდეგ ვთამაშობთ, რათა მათ გასახდელში საკუთარი როლი უკეთ გააცნობიერონ. ეს ძალიან პოზიტიური მიდგომაა, რაც ამ ასაკში ფეხბურთელებს უდიდეს დახმარებას უწევს.”

მწვრთნელმა თავისი გუნდის დინამიკასაც გაუსვა ხაზი და შეახსენა ყველას, რომ შემადგენლობის საშუალო ასაკი სულ რაღაც 18-19 წელია:

“საწყის სამ ტურში განვითარებას ვცდილობთ და გარკვეულ დეტალებს ვასწორებთ. ეს პირველ ტაიმშიც გამოჩნდა: ძალიან კარგ, კომბინაციურ მეტოქეს დავუპირისპირდით, რომელმაც უბურთოდ ბევრი შრომა გვაიძულა. განსაკუთრებით გოლის გატანის შემდეგ, უბურთო ფაზაში მოთმინება და დისციპლინა სრულად შევინარჩუნეთ.”

ბელეტიმ განსაკუთრებული ყურადღება იმაზეც გაამახვილა, რომ “ბარსა ატლეტიკს” მიმდინარე ჩემპიონატში გოლი ჯერ არ გაუშვია (მშრალი სერია მათ გარდა მხოლოდ “ტერასას” აქვს):

“დაცვითი სამუშაო თავდამსხმელითა და გარემარბებით იწყება. იკერი, კამპოსი, ჰაფიზი, გილიემი, ლანდრი… მათ ზონაში უდიდესი მოთხოვნებია: სივრცეების სწორად ათვისება და დაზღვევაზე დროული თამაში. ზედიზედ სამ მატჩში კარის მშრალად შენახვა მარტივი არ არის. ეს სათანადოდ უნდა დავაფასოთ და პროგრესი გავაგრძელოთ – კიდევ უფრო მეტი უნდა ვიშრომოთ, რათა მეტოქეებს ჩვენს კართან მომენტები ნაკლებად შევუქმნათ.”