ფერან ტორესის ტრანსფერის ფინანსური შედეგები

ფერან ტორესის დაახლოებით 50 მილიონ ევროდ პსჟ-ში ტრანსფერს “ბარსელონასთვის” არაერთი ფინანსური სარგებელი მოაქვს. ერთ-ერთი ყველაზე აღსანიშნავი დაახლოებით 35 მილიონი ევროს ოდენობის საბუღალტრო მოგებაა, რომელიც პირდაპირ 2026-27 წლების სეზონის ბიუჯეტში აისახება, როგორც არაორდინალური შემოსავალი.

ეკონომიკური სარგებელი და ფეარ-პლეი

კატალონიურ კლუბს ვალენსიელი თავდამსხმელის ტრანსფერიდან დასაფარი (ამორტიზაცია) კიდევ 11 მილიონი ჰქონდა დარჩენილი, რაც 35-მილიონიან წმინდა მოგებას განაპირობებს. გარდა ამისა, ფერანის წასვლა გამოათავისუფლებს მის ხელფასს (და აღნიშნულ ამორტიზაციას) “ბარსელონას” ამჟამინდელ ფინანსურ ფეარ-პლეიში.

ეს სიტუაცია უკვე საგრძნობლად გაუმჯობესდა ლევანდოვსკის, რაშფორდის, ანსუ ფატის, ტერ შტეგენის (ხელფასის 10%), კანსელუსა (რომელსაც ახალ კლუბთან ტრანსფერზე ჯერ არ შეუთანხმებია) და არაუხოს წასვლის, ასევე კრისტენსენის ხელფასის შემცირების შემდეგ. ეს ყველაფერი საკმარის სივრცეს ტოვებს ახალი, უკვე განხორციელებული თუ სამომავლო ტრანსფერებისთვის. მოსალოდნელია სხვა ფეხბურთელების წასვლაც, რაც გუნდში კიდევ უფრო მეტ ფინანსებს გამოათავისუფლებს.

დაზოგილი მილიონები და გზა როდრისკენ

გარდა ამისა, ფერანთან კონტრაქტის არგახანგრძლივებით, “ბარსელონა” ზოგავს იმ 8 მილიონ ევროს, რომელზეც 2021-22 წლების ზამთრის სატრანსფერო ფანჯრისას “მანჩესტერ სიტისთან” შეთანხმდა. მეორე მხრივ, გარიგება კლუბისთვის სასურველ ზღვარზე დაიხურა, რადგან ტრანსფერის 55 მილიონს გადაჭარბების შემთხვევაში, კატალონიელებს დამატებითი თანხის გადახდა კვლავ ინგლისური კლუბისთვის მოუწევდათ.

ფინანსური თვალსაზრისით ეს “ბარსელონასთვის” ძალიან პოზიტიური ოპერაციაა, რომელიც როდრის ტრანსფერზე მიმდინარე მოლაპარაკებებსაც დააჩქარებს – როგორც მიღებული შემოსავლის, ისე ფინანსურ ფეარ-პლეიში გამოთავისუფლებული სივრცის კუთხით.