8 ბარსელონელი მსოფლიო ჩემპიონატის ფინალში

16-წლიანი პაუზის შემდეგ ესპანეთის ნაკრები მსოფლიო ჩემპიონატის ფინალშია… და ისევ 8 “ბარსელონელით”.

“ფურია როხამ” ნახევარფინალში დაამარცხა საფრანგეთი, რომელიც თავიდანვე ერთ-ერთ უმთავრეს ფავორიტად მიიჩნეოდა და ტურნირის მიმდინარეობის დროს “ლურჯებმა” ეს სტატუსი კიდევ უფრო გაიმყარეს.

ტეხასში გამართულ შეხვედრაში ევროპის მოქმედი ჩემპიონები თვალშისაცემ უპირატესობას ფლობდნენ, რაც ანგარიშშიც აისახა და საფრანგეთი ბოლო სამ მუნდიალში პირველად დარჩა ფინალს მიღმა.

2-0 მოგებულ შეხვედრაში “ბარსელონელებმა” მონაწილეობა ორივე გოლში მიიღეს. 22-ე წუთზე ლამინ იამალმა თერთმეტმეტრიანი გამოიმუშავა, რომელიც გოლად იკერ ოიარსაბალმა აქცია; 58-ე წუთზე კი პედრო პორო მეკარესთან პირისპირ დანი ოლმოს კარგი პასის შემდეგ დარჩა.

ესპანეთის მხრიდან სრულად ითამაშეს პაუ კუბარსიმ და ლამინ იამალმა; დანი ოლმო 78-ე წუთზე შეცვალეს; პედრი, რომელიც ზედიზედ მეორედ სათადარიგოთა შორის მოხვდა, თამაშში 78-ე წუთზე ჩაერთო; მოედანზე 4 წუთით ადრე გამოჩნდა ფერან ტორესი. ხოლო გავი, ერიკ გარსია და ჟოან გარსია კვლავ ბოლომდე სათადარიგოთა შორის დარჩნენ.

წაგებული გუნდის მხრიდან სრულად ითამაშა ჟიულ კუნდემ.

ესპანეთის ფინალური მეტოქე ხვალ, არგენტინისა და ინგლისის დაპირისპირებაში გაირკვევა. ევროპელთა რიგებში “ბარსას” ახალწვეული ენტონი გორდონი თამაშობს, მაგრამ კატალონიური გუნდის გულშემატკივრებს ალბათ გული არ დაგვწყდება, თუ ის მე-3 ადგილისთვის ბრძოლაში ჟიულ კუნდეს დაუპირისპირდება.