ჯგუფური ეტაპი დასრულდა, მესი – არა!

მსოფლიოს 2026 წლის ჩემპიონატის ჯგუფური ეტაპი დასრულდა.

პირველი ეტაპი “ბარსელონელების” გუნდებისთვის წარმატებული გამოდგა. ჯგუფში მხოლოდ რონალდ არაუხოს ურუგვაი ჩარჩა და ისიც, შესაძლოა, იმიტომ, რომ გუნდის ერთ-ერთ ლიდერს ტრავმის გამო არ უთამაშია.

ბრაზილიამ, ნიდერლანდებმა, ესპანეთმა, საფრანგეთმა და ინგლისმა თავიანთი ჯგუფები მოიგეს, ხოლო პორტუგალია და ეგვიპტე მე-2 ადგილზე გავიდნენ.

1/16-ფინალში “ბარსელონელების” გუნდების განრიგი ასეთია:

• 29 ივნისი, 21:00, ბრაზილია-იაპონია
• 30 ივნისი, 05:00, ნიდერლანდები-მაროკო
• 01 ივლისი, 01:00, საფრანგეთი-შვედეთი
• 01 ივლისი, 20:00, ინგლისი-კონგო
• 02 ივლისი, 23:00, ესპანეთი-ავსტრია
• 03 ივლისი, 03:00, პორტუგალია-ხორვატია
• 03 ივლისი, 22:00, ავსტრალია-ეგვიპტე

“ბარსელონას” ფეხბურთელების გუნდები 1/16-ფინალში ერთმანეთთან არ იკვეთებიან და ყველა მათგანი წყვილის ფავორიტია. ეს ნიშნავს, რომ 1/8-ფინალში, შესაძლოა, შვიდივე ეს ნაკრები ვიხილოთ.

და რაც შეეხება მუდამ “ბარსელონელ” მესის… არგენტინელმა მორიგი რეკორდი დაამყარა და გახდა ისტორიაში პირველი ფეხბურთელი, რომელმაც გოლი მსოფლიო ჩემპიონატის ზედიზედ 7 თამაშში გაიტანა. 39 წლის ლეგენდა იორდანიასთან თამაშში მოედანზე მე-60 წუთზე შევიდა, ოც წუთში კი ჯარიმიდან გაიტანა და საბოლოო ანგარიში, 3-1 დააფიქსირა. აღსანიშნავია, რომ როდესაც მესი მოედანზეა, არგენტინელების მხრიდან მის გარდა გოლი ვერავის გააქვს. ჯგუფური ეტაპის შემდეგ 6 გოლით ბომბარდირთა დავას სწორედ მესი ლიდერობს და უახლოეს მდევრებს 2-2 გოლით უსწრებს. 1/16-ფინალში არგენტინა კაბო-ვერდეს დაუპირისპირდება.