რეკორდების მოლოდინში: რისი მიღწევა შეუძლია ბარსელონას სეზონის ბოლომდე?

მიუხედავად იმისა, რომ ლა ლიგის მთავარი ინტრიგა აღარ არსებობს და ტურნირის გამარჯვებული ცნობილია, “ბარსელონას” მოტივაციის ნაკლებობა ნამდვილად არ აწუხებს. კატალონიურ გრანდს წინ კიდევ რამდენიმე ისტორიული მიზანი აქვს, რომელთა გადალახვაც მიმდინარე გათამაშებას კიდევ უფრო შთამბეჭდავს გახდის.

გთავაზობთ იმ რეკორდების ჩამონათვალს, რომელთა დამყარებაც “ბარსელონას” ჯერ კიდევ შეუძლია:

• 100 ქულა: ამ მომენტისთვის გუნდს 91 ქულა აქვს. საოცნებო 100-ქულიან ზღვარს რომ მიაღწიოს, “ბარსელონამ” დარჩენილი სამივე შეხვედრა უნდა მოიგოს. წინ მატჩებია “ალავესის”, “რეალ ბეტისისა” და “ვალენსიას” წინააღმდეგ.
• უნაკლო საშინაო სერია: მიმდინარე გათამაშებაში ჩატარებული 18 საშინაო მატჩიდან “ბარსელონამ” თვრამეტივე მოიგო. თუ გუნდი “სპოტიფაი კამპ ნოუზე” ბოლო ტურში “რეალ ბეტისს” დაამარცხებს, ის სეზონს 100%-იანი საშინაო მაჩვენებლით დაასრულებს (19-დან 19 გამარჯვება).
• გოლი ყველა მატჩში: “ბარსელონამ” ლა ლიგის 35-ვე ტურში მოახერხა მეტოქის კარის აღება. იმისთვის, რომ სერია სრულყოფილი გახდეს, გუნდმა დარჩენილ 3 შეხვედრაშიც უნდა გაიტანოს.
• კვლავ 100 გოლი: კატალონიელებს შანსი აქვთ, ზედიზედ მეორე სეზონში გადალახონ 100-გოლიანი ბარიერი. ამჟამად მათ აქტივში 91 გოლია, რაც იმას ნიშნავს, რომ დარჩენილ 3 ტურში 9 ბურთის გატანაა საჭირო.