ჰანსი ფლიკის პრესკონფერენცია ოსასუნასთან თამაშის წინ

“ბარსელონას” მთავარმა მწვრთნელმა ჰანსი ფლიკმა ესპანეთის ჩემპიონატის 34-ე ტურის მატჩში “ოსასუნასთან” სტუმრად დაპირისპირების წინ პრესკონფერენცია გამართა და ჟურნალისტების კითხვებს უპასუხა.

მხოლოდ ამ მატჩზე ვფიქრობთ. ვეთამაშებით ძალიან გამოცდილ, ძლიერ გუნდს, რომელსაც ბუდიმირის მსგავსი შესანიშნავი თავდამსხმელი ჰყავს და ფანტასტიკური ატმოსფერო აქვს. იმავე დონეზე უნდა ვითამაშოთ, როგორც ბოლო მატჩში “ხეტაფესთან” ვითამაშეთ. იმედი მაქვს, თავისუფალ სივრცეებს მაქსიმალურად გამოვიყენებთ.

მახსოვს “ოსასუნასთან” სტუმრად ჩატარებული მატჩი, რომელშიც დავმარცხდით. მაშინ სასტარტო შემადგენლობაში ბევრი რამ შევცვალეთ და ხვალ ეს აღარ მოხდება. კარგ ფორმაში ვართ, მაგრამ ასევეა “ოსასუნაც”. მათ ევროპაში თამაშის შანსი აქვთ. სიტუაციები განსხვავდება, მაგრამ მზად ვართ.

არ ვიცი, შეძლებს თუ არა კრისტენსენი სეზონის ბოლო რომელიმე მატჩში მონაწილეობას. ბერნალი ხვალ განაცხადში იქნება და შესაძლოა, ითამაშოს.

ჩემპიონთა ლიგის ნახევარფინალებში დანიშნული პენალტები და სამსაჯო სტანდარტები? სიმართლე გითხრათ, ამაზე ფიქრი არ მინდა.

იამალი და მისი ჯანმრთელობის მდგომარეობა? ესპანეთის ნაკრების ექიმებთან კონტაქტში ვართ. ლამინი კარგად პროგრესირებს. მას მსოფლიო ჩემპიონატზე ვიხილავთ. იამალს გამოსაჯანმრთელებლად დრო აქვს.

ჩავი ესპარტის შესაძლებლობებს ვაფასებ. ის მომდევნო სეზონისთვის კარგი ვარიანტია.

შეგვიძლია თუ არა პსჟ-სა და “ბაიერნის” მსგავს გუნდებთან კონკურენცია? დიახ, 100%-ით.

რაფინია არის ფეხბურთელი, რომელიც ყოველთვის 100%-ით იხარჯება. მას რამდენიმე რთული დღე ჰქონდა და მნიშვნელოვანია, რომ დაბრუნდა. ის პამპლონაში ჩვენთან ერთად გაფრინდება, შემდეგ კი ვნახოთ, რა მოხდება. ის ჩვენი ერთ-ერთი კაპიტანია.

ლევანდოვსკის მომავალი? ამაზე ვისაუბრეთ, მაგრამ ეს ჩვენ შორის რჩება. ფოკუსი დარჩენილ 5 მატჩზე გვაქვს. როდესაც სეზონს დავასრულებთ, ამ საკითხზე ისევ ვისაუბრებთ. ვნახოთ, რა მოხდება.

ხალხის სიყვარულს ყოველდღე ვგრძნობ. ეს ფანტასტიკურია, ძალიან მადლიერი ვარ. ეს ჩემთვის პატივია. როდესაც “ბარსას” მსგავს გუნდს წვრთნი, საქმე ტიტულების მოგებას ეხება და მეც და ჩემს შტაბსაც მხედველობაში ეს მიზანი გვქონდა. ამ კლუბში ფანტასტიკური ატმოსფეროა, მათ შორის გასახდელშიც.

შეიძლება გყავდეს საუკეთესო ფეხბურთელები, მაგრამ ტიტულების მოსაგებად საუკეთესო გუნდი გჭირდება. ჩემთვის მნიშვნელოვანია, როგორ ვმართავთ საკუთარ თავს, როგორ ვთამაშობთ ერთად და ერთმანეთისთვის. ეს ფაქტორები ქმნის სხვაობას და სწორედ ეს მახარებს. ფეხბურთელები ამ კლუბისთვის ყველაფერს აკეთებენ და ეს აშკარაა.

100 ქულა? ციფრები დიდად არ მაინტერესებს. ჩემთვის ყველა მატჩის მოგება შესანიშნავი იქნებოდა, მაგრამ ძლიერი მეტოქეები გვყავს. ჩვენი საუკეთესო დონე უნდა ვაჩვენოთ. ეს ჩვენი ფილოსოფია და მენტალიტეტია. ბედნიერი ვარ იმით, რასაც ვარჯიშებზე ვხედავ. გუნდი 100%-ით კონცენტრირებულია.