ბართომეუ არ ნებდება და ბინძური ხერხებით იბრძვის

როგორც ჩანს, ბართომეუს ბორდი თანამდებობების შენარჩუნებას ბინძური ხერხებით აპირებს.

ცოტა ხნის წინ ცნობლი გახდა, რომ ამჟამინდელი ხელმძღვანელობის უნდობლობის საკითხის აღსაძრავად საჭირო ხმები შეგროვდა. საჭირო იყო 16 251 ხმა, ოპოზიციამ 20 ათასზე მეტი ხმა წარადგინა, რომელთაგან 19 ათასზე მეტი ვალიდურად ცნეს. ეს იმის ნიშანი იყო, რომ თუ ბართომეუ არ გადადგებოდა, მისი უნდობლობის საკითხის რეფერენდუმზე დაყენება გარდაუვალი იყო.

თუმცა, დღეს “ბარსელონამ” კატალონიის პოლიციას მიმართა და ხელმოწერების შეგროვების დროს დოკუმენტების გაყალბების თაობაზე საქმის აღძვრა მოითხოვა. პოლიციამ “ბარსელონასგან” დამატებითი მტკიცებუელებები მოითხოვა, რადგან წარდგენილი მტკიცებულებები არასაკმარისი აღმოჩნდა.

კატალონიის რადიოს ინფორმაციით, ამის პარალელურად, 5 კაციანმა კომისიამ, რომელსაც უნდობლობის საკითხის მართვა ევალება, ამ პროცესის შეჩერებას კენჭი უყარა. სამი ორის წინააღმდეგ – ასეთი იყო შედეგები უნდობლობის საკითხის გაგრძელების სასარგებლოდ. პროცესის შეჩერებას ხმა მარტა პლანამ და ჟორდი არხემიმ მისცეს. რა გასაკვირია, რომ სწორედ ისინი არიან 5 კაციან კომისიაში “ბარსელონას” დირექტორთა საბჭოდან წარდგენილები.

დღევანდელი დღის მოკლე შეფასება ასეთია: ბართომეუ თანამდებობის შენარჩუნებისთვის ყველა ხერხს მიმართავს, მაგრამ ჯერჯერობით ყველა ფრონტზე მარცხდება.