სეზონის პროგნოზები

სატრანსფერო ფანჯარა დაიხურა. კლუბის ისტორიაში ერთ-ერთი ყველაზე წარმატებული კამპანია მივიღეთ, თუმცა, წარმატებულსა და წარუმატებელს მომდევნო სეზონის მიხედვით განვსჯით. ასე სახელებით თუ ვიმსჯელებთ, უმაგრესი ტრანსფერები გამოვიდა. 

“ბარსას” სჭირდებოდა დაცვის ხაზის გაძლიერება და ოთხი მცველი მივიღეთ! ბელერინი, კუნდე, კრისტენსენი, ალონსო, – თითოეული პოზიცია გაძლიერდა. 

“ბარსას” სჭირდებოდა აგრესიული ნახევარმცველი, რომელიც მოგებული ბრძოლების პროცენტს გაზრდიდა, ერთ შემთხვევაში კესიე მივიღეთ, მეორე მხრივ პიანიჩი დაბრუნდა, რომელსაც ჩავი სულ სხვაგვარად გამოიყენებს და მესამე მხრივ ფრენკი დე იონგი შენარჩუნებულია. მართალია, ბერნარდუ ვერ დავიმატეთ, მაგრამ ცუდი მოცემულობა ნამდვილად არ არის. 

გვჭირდებოდა გარემარბი და მივიღეთ რაფინია, დასაწყისი მშვენიერი აქვს, გარდა ამისა, მივიღეთ განახლებული დემბელე, დაოჯახებული, დაკაცებული, აზრზე მოსული დემბელე, რომლის პროდუქტიულობაც საოცრად გაზრდილია. რეალურად ის ნაბიჯები გადადგა წინ, რაც სადებიუტო სეზონში უნდა გადაედგა. 

გვინდოდა დიდი ტრანსფერი და მივიღეთ ლევანდოვსკი! 

მშვენიერია. 

წავიდნენ  – რიკი პუჩი, ოსკარ მინგესა, სამუელ უმტიტი, კლემან ლანგლე, მარტინ ბრეითუეიტი, ლუკ დე იონგი, დესტი, ვაგე, ადამა ტრაორე, წავიდა ნიკო გონსალესი იმისათვის, რომ პრაქტიკა მიიღოს და გაძლიერებული დაგვიბრუნდეს, გუშინ კი წავიდა ობამეიანგი, რომელიც ჩამოთვლილთაგან ყველაზე დიდი დანაკლისია, თუმცა, სხვაგვარად არ გამოდიოდა. ობა იმ ასაკშია, რომ ფლანგზე მისი თამაში დიდი სარგებლის მომტანი ვერ იქნებოდა, ცენტრში კი ლევანდოვსკი გვყავს, ამიტომ, ასე სჯობდა. “ჩელსიში” ბევრად მეტი დრო ექნება. 

გუნდი დაკომპლექტებულია. 

გასაგებია, რატომ სურდათ კიდევ ერთი დიდი ტრანსფერი, “ბარსა” ძალიან რთულ ჯგუფში მოხვდა, ლიგის ჯგუფიდან გასვლა კი ფინანსური თვალსაზრისით სასიცოცხლოდ მნიშვნელოვანია, არა მხოლოდ იმ ბონუსების გამო, რომელსაც კლუბი მიიღებს, არამედ კომერციული პროექტების გათვალისწინებით, სადაც “ბარსას” იმიჯს გადამწყვეტი როლი ექნება. არ გამოვიდა სიურპრიზი და მეორე დიდი ტრანსფერი, თუმცა, მგონია, რომ ესეც საკმარისია. იმ პირობებში, რაშიც “ბარსა” იმყოფება, ფანტასტიკური სატრანსფერო კამპანია გამოვიდა. 

მაშ ასე, დავიწყოთ ტრადიციული პროგნოზები. წინა სეზონის პროგნოზები სეზონის ბოლოს გამოქვეყნდა და რამდენიმე მომხმარებელმა ფაქტობრივად ყველაფერი გამოიცნო. 

კითხვა პირველი, – ვინ მოიგებს ლა ლიგას? 

პირველად მიწევს პოზიტიური პროგნოზის დაწერა. პირველად ვწერ, რომ “ბარსა” მოიგებს. წინა ორი წლის განმავლობაში “რეალი” და “ატლეტიკო” დამიწერია, ახლა კი სხვა დროა, ახლა “ბარსას” დროა, გუნდი მზად არის ლა ლიგის დასაბრუნებლად. მთავარი კონკურენტი “რეალი” იქნება, “ატლეტიკოც” იტრიალებს მახლობლად, დაძაბულობა სავარაუდოდ ბოლო ტურებამდე შენარჩუნდება, არც “რეალია” ის გუნდი, რომელიც ქულებს არ დაკარგავს და არც “ბარსა”. 

მოლოდინი ასეთი მაქვს, ჩემპიონობა უნდა დაბრუნდეს! 

რამდენი ტიტულით დაასრულებს “ბარსა” სეზონს? 

ვივარაუდებ ორს. გარდა ლა ლიგისა, ესპანეთის თასზეც შეგვიძლია წარმატება, სკამი გრძელია, ფეხბურთელების დონეში ეჭვი არ მეპარება, თავიდანვე დიდ გამოცდილებას შეიძენენ, არ ვიცი ჩემპიონთა ლიგის ჯგუფში რა მოხდება, მაგრამ “ინტერთან” და “ბაიერნთან” თამაში “ბარსას” მაგრად უნდა წაადგეს მთელი დარჩენილი სეზონი. 

კოპა უნდა დაიდოს! 

რაც შეეხება ჩემპიონთა ლიგას, მგონია, რომ ჯგუფიდან გავალთ, მინიმუმ მეოთხედფინალის მოლოდინი მაქვს, მაქსიმუმს კი წილისყრა განსაზღვრავს. 

საუკეთესო ტრანსფერი

ბევრს არ დავწერ, – ლევანდოვსკი. 

მოდი დავსვათ კითხვა, – რომელი იქნება მეორე საუკეთესო ტრანსფერი? ასე უფრო მეტი ინტრიგა გვექნება. 

გარდა ლევანდოვსკისა, ფსონს კუნდეზე ჩამოვიდოდი. ვნახოთ. ჩემი ნომერი ორი იქნება კუნდე. 

სეზონის საუკეთესო ფეხბურთელი 

აქაც ლევანდოვსკიზე მექნება აქცენტი, უკვე გუნდის ლიდერია. არ დავმალავ, ერთი წლის წინ, როცა ტუხელს ლევანდოვსკის დამატება ათიანის პოზიციაზე სურდა, მაგრად გამეცინა, საერთოდ ვერ გავიგე, რა უნდოდა, ახლა კი მესმის, ჩვენი ცხრიანი ათიანის ფუნქციებსაც ითავსებს, იდეალურად ანაწილებს ბურთს და ყველაზე ინტელექტუალი აღმოსავლეთევროპელია, ვინც ოდესმე მინახავს. 

რაც შეეხება მეორე საუკეთესო ფეხბურთელს, შტეგენს, პედრისა და არაუხოს შორის, მაინც პედრის ვიტყოდი.

სეზონის იმედგაცრუება

ჩემი საყვარელი ნომინაციაა. შეიძლება ყველაფერი შემეშალოს, მაგრამ ეს არ მეშლება. ამ ნომინაციაში უნდა დავასახელოთ ფეხბურთელი, რომლისაც მაგრად გვეიმედება და საბოლოოდ იმედს გაგვიცრუებს. რთულია, თითქოს აღარავინ დარჩა ასეთი, მაგრამ იმედგაცრუება ყველა სეზონს ჰყავს, აბსოლუტურად ყველას, შესაბამისად, მხოლოდ გამოცნობაა საჭირო. ხელი მიკანკალებს, მაინც დავწერ, მგონია, რომ ფრენკი დე იონგი იქნება იმედგაცრუება. 

საუკეთესო ვეტერანი

თუ პიკესა და ალბას მდგომარეობას გავითვალისწინებთ, მაშინ ბუსკეტსი. რთული არჩევანი ნამდვილად არ არის. 

საუკეთესო ახალგაზრდა ფეხბურთელი 

ისევ და ისევ პედრი. ფატისა და გავის დიდი პატივისცემის მიუხედავად. 

საუკეთესო ბომბარდირი და ასისტენტი

ლევანდოვსკისგან ველი 25+ გოლს ლა ლიგაში. 

საუკეთესო ასისტენტი კი წესით დემბელე უნდა გახდეს. 

საბოლოოდ სურათი 

ვინ მოიგებს ლა ლიგას? – “ბარსა”. 

რამდენი ტიტულით დაასრულებს სეზონს? – ორით. (ლა ლიგა, კოპა). 

საუკეთესო ტრანსფერი – 1. ლევანდოვსკი, 2. კუნდე. 

სეზონის საუკეთესო ფეხბურთელი – ლევანდოვსკი. 

სეზონის იმედგაცრუება – ფრენკი. 

საუკეთესო ვეტერანი – ბუსკეტსი. 

საუკეთესო ახალგაზრდა – პედრი. 

საუკეთესო ბომბარდირი – ლევანდოვსკი. 

საუკეთესო ასისტენტი – დემბელე. 

აი, ეს არის ჩემი პროგნოზები. ჩამოწერეთ თქვენი და სეზონის ბოლოს ვნახოთ რა გამოვა ამ საქმიდან.