ერთიც და გავდივართ

ჟიულ კუნდე ჩვენიანია! თანამედროვეობის ერთ-ერთი საუკეთესო ცენტრალური მცველი, სულ რაღაც 23 წლის, რომელსაც აქვს პოტენციალი ძალიან დიდი სახელი დატოვოს კლუბში. კარლეს პუიოლის სიმაღლის გახლავთ, სტილით კი არაუხოს მაგონებს, უყვარს ხალხის მილეწ-მოლეწვა, ფაქტობრივად გადაჭრილი არაუხოა. სწორედ აქ მიჩნდება ერთი კითხვა, – რამდენად შეძლებს ეს ორი ერთმანეთის დაბალანსებას? ორივე ხისტია, ორივეს რისკი უყვარს, ორივე უმეტესად დასწრებაზე ცდილობს თამაშს. ერთადერთი, ეს ამბავი მაფიქრებს, თორემ, ამ ორზე მაგარი ცენტრი ახლა ვის ჰყავს?! 

ისიც საკითხავია, არაუხოს მარჯვენა ფლანგზე ხომ არ უპირებენ გადასროლას, რა თქმა უნდა, იქნება მატჩები სადაც ეს აუცილებლად მოხდება, მაგრამ, რა რაოდენობით? ამჟამად ხუთი ცენტრალური მცველია გუნდში, გარდა ამ ორი მხეცისა გვყავს კრისტენსენი, რომელიც საქმეშია სანახავი. თავის დროზე ძალიან პერსპექტიულ მცველად იყო მიჩნეული და დიდ მომავალსაც უწინასწარმეტყველებდნენ, დაახლოებით ისეთს, რომ “ჩელსის” ფანებს დესაი და ტერი გახსენებოდათ, მაგრამ კრისტენსენის შემხედვარე არც ერთი გაგახსენდება კაცს და არც მეორე. რაღაც ვერ აეწყო, რაღაც ვერ გამოვიდა, ჰოდა, ვნახოთ რა ბიჭია. მნიშვნელოვანია, რომ მარცხენა ცენტრალურ მცველად თამაში კუნდესაც შეუძლია, კრისტენსენსაც და ერიკ გარსიასაც, მაგრამ, მაინც უნდა აღვნიშნოთ, რომ ამჟამად ცაცია ცენტრალური მცველი არ გვყავს. (უმტიტის არ ვთვლი). 

როგორც იქნა, ცენტრის პრობლემა მოხსნილია. გახსოვთ ალბათ პიკემ ლაპორტას რა უთხრა, – ვინც გინდა ის მოიყვანე, ყველას სკამზე დავსვამო. დაახლოებით ასე ჟღერდა, – თუ გინდა პაოლო მალდინი მოიყვანე ფეხებს ვერ მომჭამს ვერავინო. კარგია ასეთი განწყობა, სხვაგვარად არც შეიძლება იყოს, კაცი პრეზიდენტობას აპირებს მომავალში, მაგრამ, ახლა ისე ჩანს რომ მოუწევს სკამზე დიდხანს ჯდომა. 

ბევრი რამის შეცვლა შეუძლია იმ ერთი კაცის მოსვლას, რომელსაც ველით. საუბარია ასპილიკუეტაზე, უნივერსალ განაპირა მცველზე, დაცვაში თუ სუსტი წერტილი დაგვრჩა, ალბას ასაკისა და დესტის განუვითარებლობის ბრალია. სერჟინიომ მოუმატა, ნამდვილად, რაღაც კომპონენტებში გაუმჯობესდა, მაგრამ რამდენად არის ეს საკმარისი იმისათვის, რომ ძირითადის წევრი იყოს? – აი, ეს არის კითხვა. მე მგონი, რომ არ არის. 

ამიტომ, ველით ასპის. სხვათა შორის, არც ბალდეს დაუტოვებია ცუდი შთაბეჭდილება. 

თუ ასპი არ მოვიდა, პირველ ვერსიას მივუბრუნდები, – არაუხოს ძალიან ხშირად ვიხილავთ ფლანგზე. 

დე იონგის თემა 

ხელფასის მაქსიმალურად შემცირებას თუ დათანხმდა, რაღაც შეიძლება გამოვიდეს. თუ არადა წასვლა მოუწევს, რიგში კი ბერნარდო სილვა დგას, ფანტასტიური ფეხბურთელი, რომელიც “ბარსას” დახატავს, მაგრამ კითხვები აქაც ჩნდება. 

ორივე უნივერსალია, დე იონგიც და ბერნარდოც, მაგრამ სხვადასხვა სივრცეებს ითვისებენ, კერძოდ, – დე იონგის შემთხვევაში გვყავს რვიანის პოზიციაზე მოთამაშე ნახევარმცველი, შეგვიძლია გამოვიყენოთ ექვსიანზე, სადაც ყველაზე უკეთ გრძნობს თავს, შეგვიძლია გამოვიყენოთ ცენტრალურ მცველად, სადაც მთელი მოსამზადებელი ეტაპი გაატარა. კუმანის ექსპერიმენტების ხარჯზე ათიანზე და ცრუ ცხრიანზეც ითამაშა, მაგრამ ეგ ზედმეტი იყო, ძირითადად ეს სამი პოზიცია ეკუთვნის, – რვიანი, ექვსიანი და ცენტრალური დაცვის ზონა. 

დე იონგის დარჩენის საჭიროებას მხოლოდ ექვსიანის პოზიცია განაპირობებს. რვიანზე აუცილებლად სჭირდებათ პრაქტიკა გავისა და პედრის, ეს ორი “ბარსას” მომავალია. ექვსიანზე კი ბუსკეტსს დიდი დრო არ დარჩენია და ნიკო ისეთი ვარსკვლავი ვერ არის, როგორც ზემოთ ჩამოთვლილები. ამიტომ, თუ ვინმეს ენანება დე იონგის გაშვება, მხოლოდ იმიტომ, რომ ექვსიანზე ხედავენ, კარგად ჯდება, არაფერს აშავებს, ბუსკეტსის დრო ნელ-ნელა მიდის. ეს ამბავია. 

რაც შეეხება ბერნარდოს. გამოვრიცხოთ დაცვა, გამოვრიცხოთ საყრდენი ზონა. გვყავს რვიანზე მოთამაშე შემტევი ნახევარმცველი, რომელიც ჩავის ტაქტიკაში მარჯვენა გარემარბადაც მშვენივრად ითამაშებს, მაგრამ, გადავხედოთ პოზიციებს, მარჯვენა ფლანგზე დემბელე და რაფინია ერთმანეთს ჭამენ, ამათ კიდე ბერნარდო რომ დაუმატო დედა შვილს არ აიყვანს ხელში, სამივე ნაკრების წევრია, წინ მუნდიალია, ამ პირობებში კარგი ატმოსფეროს შენარჩუნება გამორიცხულია. 

რვიანის პოზიციაზე კი გავის დასვამს სკამზე. გავი რომ ყველა მატჩს ძირითადში ვერ ითამაშებს, მით უმეტეს, 90 წუთს გასაგებია, მაგრამ სტატუსის ამბავია, ვინ იქნება ძირითადის წევრი? ბერნარდო სკამისთვის არ გადმოვა, გავისთვის კი ნდობა ძალიან მნიშვნელოვანია. არავინ იცის სკამზე გადასმა როგორ იმოქმედებს მასზე, ნებისმიერ შემთხვევაში რისკია. თანაც, ამ მოსამზადებელზე გამოჩნდა რომ გაზრდილია, ძალაც უფრო მეტი აქვს, ფეხზეც უფრო მყარად დგას. 

გვინდა საერთოდ ბერნარდო სილვა? ორი აზრი არ არის, უმაღლესი დონის ფეხბურთელია, თანაც “ბარსას” სტილის, მაგრამ, საჭირო დროა ახლა ამისთვის თუ არა? 

ყველაფერს ჩავი გადაწყვეტს. მხოლოდ მან იცის ვის როგორ გამოიყენებს და რამდენი ხნით. მე კი ძალიან არ მინდა გავის სათამაშო დრო მოაკლდეს. 

ნებისმიერ შემთხვევაში, “ბარსა” უკვე არის სუპერ გუნდი. გახსოვთ სულ რაღაც ერთი წლის წინ რას ვამბობდით, როცა გუნდი კინაღამ 10 წლით დამარხეს? 

ვამბობდით, რომ გვყავს შტეგენი, არაუხო, პედრი, ნიკო, გავი, მორიბა, ფატი, რომელთაც შეუძლიათ გახდნენ საფუძველი ახალი კლუბისა. (მორიბა ჩავარდა, აღმოჩნდა რომ დიდი დანაკლისი არ ყოფილა). დარჩენილი პოზიციების გაძლიერება კი სუპერ გუნდად გვაქცევდა, ჰოდა, ასეც მოხდა, – არაუხო მარტო აღარ არის. ნახევარდაცვა გაძლიერდა და კონკურენციაა, შეტევაში კი ამხელა არჩევანი ძალიან დიდი ხანია არ გვქონია, ალბათ, ეტო’ოსა და ლარსონს რომ კონკურენცია უწევდათ, იმის მერე ასეთ ამბავში არ ვყოფილვართ. 

ჩავის ფაქტორი

ბუსკეტსი, გავი, პედრი, ნიკო, დე იონგი (ჯერჯერობით), კესიე, პიანიჩი, თითქოს ახალი ფეხბურთელისთვის, თანაც ისეთისთვის როგორიც ბერნარდო სილვაა ადგილი აღარ უნდა იყოს, მაგრამ 2005/06 წლების სეზონი გავიხსენოთ. ძირითადის წევრებად დეკუ და ვან ბომელი ითვლებოდნენ, ჩავისა და ინიესტას დუეტი კი ფაქტობრივად არ გვინახავს. მიზეზი ამისა იყო ჩავის მძიმე ტრავმა სეზონის შუა ნაწილში, ინიესტა კი ჯერ ის არ იყო, ვინც მერე გახდა, ამიტომ, ხან საყრდენად ათამაშებდნენ, ხან მარცხენა გარემარბად, ხანაც თავის პოზიციაზე. რეალურად, ოთხივე ნახევარმცველი ძირითადის კანდიდატი იყო, ამით იმის თქმა მსურს, რომ ჩავის საკმარისი გამოცდილება აქვს, იცის, რომ სეზონი გრძელია, იქნება ტრავმები და იქნება სხვა პრობლემებიც, ხანგრძლივ სეზონში კი, ბევრი კონკურენტუნარიანი ფეხბურთელი გჭირდება. 

ასეთი ამბავია.