პეპ გვარდიოლას, როგორც მწვრთნელის ციფრები მადრიდის ”რეალთან” გასვლით მატჩებში ძალიან პოზიტიურია. მას 5 მატჩიდან 3 მოგება და 2 ფრე აქვს ნათამაშები, მისმა გუნდმა გაიტანა 13 და საკუთარ კარში მიიღო 5 გოლი.
”ბერნაბეუ” ძალიან სანდომიანია გვარდიოლასთვის. მუდმივი მეტოქის მოედანზე პეპს 5 ვიზიტიდან მარცხი არცერთში განუცდია. ბალანსი ძალიან პოზიტიურია: 3 მოგება და 2 ფრე. თუკი მხოლოდ პრიმერას მატჩებს დავთვლით 2 მოგება და 1 ფრე.
პირველი ორი ვიზიტი, ორივე მოგება
პირველი ორი ვიზიტის დროს პეპ გვარდიოლას გუნდი ლა ლიგის გადამწყვეტ ფაზაში იყო. ორივე შემთხვევაში, ხუანდე რამოსის და მანუელ პელეგრინის გუნდების დამარცხება გადამწყვეტი აღმოჩნდა. პირველი ისტორიული 2:6 იყო. გოლები ანრის (2), მესის (2), პიკეს და პუიოლი ანგარიშზეა. მეორე შეხვედრა ამავე მნიშვნელობის იყო, რომელიც პედროს და მესის გოლებით ”ბარსამ” 0:2 მოიგო.
ორი ფრე და ერთი გამარჯვება მოურინიოს წინააღმდეგ
მისი მესამე ვიზიტი ბერნაბეუზე ოდნავ განსხვავებული იყო, ”ბარსას” წინ კლასიკოების მთელი სერია ელოდა. მატჩი 1:1 დასრულდა, გოლები მესიმ და რონალდომ გაიტანეს, ორივემ თერთმეტმეტრიანი დარტყმით. ამ ფრის შემდეგ ”ბარსა” ძალიან დაუახლოვდა პრიმერას ტიტულს. რამდენიმე დღის შემდეგ ”ბარსა” მადრიდში დაბრუნდა, ჩემპიონთა ლიგის 1/2 ფინალური მატჩის პირველი შეხვედრის გასამართად. ”ბარსელონამ” 0:2 გაიმარჯვა, ლეო მესის 2 გოლით მეორე ტაიმში გუნდი ძალიან დაუახლოვდა ”უემბლის” ფინალს.
უკანასკნელი ვიზიტი ”ბერნაბეუზე” რამდენიმე თვის წინ იყო, აგვისტოში. გუნდები ესპანეთის სუპერთასისთვის იბრძოდნენ. გვარდიოლას გუნდმა 2:2 ითამაშა, გოლები კი ვილიას და მესის ანგარიშზეა.
ასეთი კარგი შედეგები გვარდიოლასთვის, როგორც მწვრთნელისთვის განსხვავდება გვარდიოლას ფეხბურთელობის სტატისტიკიდან. ”ბერნაბეუზე” პეპს მხოლოდ ერთი მოგება აქვს 1993/94 წელს (0:1). დანარჩენი 6 ვიზიტიდან მან 3-ჯერ მარცხი იგემა, ხოლო 3 შეხვედრა ფრედ დასრულდა.
