ჰანსი ფლიკის შესაძლო ტაქტიკური დილემა ბარსელონაში

ჰანსი ფლიკი 10 ივლისს ბარსელონაში პირველ სავარჯიშო სესიას ჩაატარებს და მუშაობას შეუდგება.

გერმანელი მენეჯერის ფავორიტი სქემა 4-2-3-1 არის და თუ ბარსაშიც ამ ფორმაციას გამოიყენებს, საინტერესოა, შემტევი ნახევარმცველის პოზიციაზე პედრის დააყენებს თუ ილქაი გიუნდოგანს.

ჩანს, რომ პედრი აღნიშნულ პოზიციაზე ესპანეთის ნაკრებში შესანიშნავად ასპარეზობს. “ფურია როხას” თავკაცი, ლუის დე ლა ფუენტე 21 წლის ფეხბურთელს მეტოქის საჯარიმოსთან ახლოს ათამაშებს, საიდანაც მას საგოლე მომენტების შექმნის მეტი შესაძლებლობა აქვს.

ამასთან, გიუნდოგანმა აღნიშნა, რომ გასულ სეზონში ბარსელონაში კონკრეტული პოზიცია არ ჰქონდა, რითაც დაიღალა. გერმანიის ნაკრებში ისიც სწორედ შემტევ ნახევარმცველად თამაშობს და ბრწყინვალედ გამოიყურება.

Tribuna.com-ის ვერსიით, საუკეთესო გამოსავალი იქნება, რომ გიუდოგანმა პედრის უკან ითამაშოს: გერმანელი სიღრმიდან შეტევების დაწყებაში ძლიერია და პოზიციების დაკავებაშიც უფრო გამოცდილია. თანაც, ისიც გასათვალისწინებელია, რომ გავი ტრავმირებულია, მიკელ მერინო (ბარსას ერთ-ერთი სატრანსფერო სამიზნე) კი კლუბს ჯერ არ გაუფორმებია, შესაბამისად, აღნიშნული ადგილი ვინმემ უნდა შეავსოს – ამისთვის ილქაი კარგი ვარიანტია.

როცა პედრი თავდამსხმელებთან ახლოს მოქმედებდა, საუკეთესო ფორმას აჩვენებდა, ამიტომ ის ბარსელონაში ხსენებულ პოზიციაზე შანსს იმსახურებს.