პაბლო ტორე ბარსელონას წინააღმდეგ ვერ ითამაშებს

გუშინწინ ცნობილი გახდა, რომ “ბარსელონას” ახალგაზრდა ფეხბურთელი პაბლო ტორე მომდევნო სეზონში “ჟირონაში” იჯარით ითამაშებს.

20 წლის ნახევარმცველს ახალ გუნდში ამხანაგურ მატჩში დებიუტი უკვე ჰქონდა და იმედია, მთელი სეზონის განმავლობაში ის სასტარტო შემადგენლობის წევრი იქნება. თუმცა ასე ვერ მოხდება, როდესაც “ჟირონა” “ბარსელონას” დაუპირისპირდება.

კატალონიის რადიოს ცნობით “ჟირონასთან” შეთანხმებაში “ბარსელონამ” ჩადო პუნქტი, რომლის თანახმადაც პაბლო ტორეს “ბლაუგრანას” წინააღმდეგ თამაშის უფლება არ აქვს. მართალია, ბოლო წლებში ესპანეთში მოქმედი წესებით კონტრაქტში პირდაპირ ასეთი პუნქტის ჩაწერა აკრძალულია, მაგრამ “ბარსამ” გამოსავალს მაინც მიაგნო – ტორეს მესაკუთრე გუნდის წინააღმდეგ თამაშის უფლება კი აქვს, მაგრამ ასეთ შემთხვევაში “ჟირონას” “ბარსელონასთვის” თანხის გადახდა მოუწევს. ასე დაიზღვია “ბლაუგრანამ” თავი.

“ბარსა” ამ პრაქტიკას 2022 წლის შემდეგ მიმართავს. წელიწადნახევრის წინ “გრანადასთან” გამართულ მატჩში გავი მოედნიდან ალექს კოლიადოსთან უხეშობის გამო გააგდეს. კოლიადო “გრანადაში” “ბარსელონადან” იყო განათხოვრებული. იმ დროისთვის “ბლაუგრანა” 1-0 იგებდა, მაგრამ თამაში 1-1 დასრულდა.

ამ თამაშის შემდეგ კატალონიურ კლუბში გადაწყვიტეს, რომ განათხოვრებულმა ფეხბურთელებმა “ბლაუგრანას” წინააღმდეგ არ უნდა ითამაშონ. ასე იყო წინა სეზონშიც და როგორც ჩანს, ასე იქნება მომავალშიც.