როდის დაბრუნდება ანსუ ფატი

ჩავი ერნანდესმა გუშინდელ პრესკონფერენციაზე ანსუ ფატის მალე დაბრუნების იმედი გამოთქვა. მწვრთნელის თქმით, ფეხბურთელი გამოჯანმრთელების ბოლო ეტაპზეა, თუმცა სიმართლე ისაა, რომ ესპანელს დაბრუნებამდე ჯერ კიდევ დიდი დრო აშორებს.

AS-ის ინფორმაციით, 19 წლის შემტევი თამაშს აპრილის ბოლომდე ვერ შეძლებს. მიუხედავად იმისა, რომ მისი გამოჯანმრთელების პროცესი კარგად მიმდინარეობს, კლუბი თავდაპირველი გეგმის შეცვლას არ აპირებს და აღდგენითი პროცესი დაახლოებით 2.5 თვეს გასტანს.

წყაროს თანახმად, ფატი, საუკეთესო შემთხვევაში, ვარჯიშს 20 მარტს გასამართი “ელ კლასიკოს” შემდეგ დაიწყებს და ფორმაში ჩასადგომად სანაკრებო პაუზასაც გამოიყენებს. იგი მინიმუმ სამი კვირის განმავლობაში ივარჯიშებს და თამაშის ნებართვას მხოლოდ ამის შემდეგ მიიღებს. 

როგორც სამწვრთნელო, ისე სამედიცინო შტაბი ფატის ჯანმრთელობას ძალიან უფრთხილდება. ფეხბურთელმა იცოდა, რომ ოპერაციაზე უარის თქმის შემთხვევაში რეციდივის შანსი უფრო დიდი იქნებოდა, თუმცა მან მაინც კონსერვატიული მეთოდით მკურნალობა გადაწყვიტა. ამასთან, საბედნიეროდ, “ბარსელონას” შეტევაში არ უჭირს, შესაბამისად, ფატის ნაადრევად დაბრუნება საჭირო არაა. 

19 წლის ფეხბურთელმა დაზიანება 20 იანვარს ბილბაოს “ატლეტიკის” წინააღმდეგ მიიღო.