ბარსელონამ ფაბიან რუისის შეძენა სამჯერ ცადა, კატალონიელებს კიდევ ერთი შანსი ექნებათ

“ბარსელონამ” “ნაპოლის” ესპანელი ნახევარმცველის, ფაბიან რუისის შეძენა სამჯერ ცადა. Mundo Deportivo-ს ინფორმაციით, სამჯერვე პრობლემა იტალიური კლუბის მაღალი მოთხოვნები გახდა. 

კატალონიელებმა პირველად 2019 წელს გაიბრძოლეს. მაშინ “ბლაუგრანას” მთავარი მწვრთნელი ერნესტო ვალვერდე იყო, რომელმაც რუისის ტრანსფერს მწვანე შუქი აუნთო, თუმცა ესპანელი “ნაპოლიში” მხოლოდ ერთი წლის გადასული გახლდათ და პრეზიდენტმა აურელიო დე ლაურენტისმა 80 მილიონი ევრო მოითხოვა, რომლის გადახდაზეც “ბარსამ” უარი თქვა.

2020 წელს “ბარსელონას” მთავარ მწვრთნელად კიკე სეტიენი დაინიშნა, რომელიც რუისს “ბეტისში” წვრთნიდა, ამიტომ მის ტრანსფერს მიესალმებოდა. მაშინ სპორტულ დეპარტამენტს რამონ პლანესი ხელმძღვანელობდა, რომელიც პრობლემად კვლავ მაღალ ფინანსურ მოთხოვნებს გადააწყდა.

გასულ წელს, როდესაც “ლურჯ-ბროწეულისფერთა” თავკაცი რონალდ კუმანი იყო, “ბარსელონა” რუისის ხელმძღვანელობას კიდევ ერთხელ დაუკავშირდა, თუმცა “ნაპოლის” მიერ დასახელებული სატრანსფერო ფასი კვლავ გადაულახავ ბარიერად დარჩა – ლაურენტისმა ამჯერად 50-60 მილიონი მოითხოვა, “ბარსაში” სჯეროდათ, რომ ესპანელში ამხელა თანხის გადახდა არ ღირდა.

MD-ს ცნობით, “ბლაუგრანას” რუისის შეძენის შანსი კიდევ ერთხელ ექნება. ფაბიანს “ნაპოლისთან” კონტრაქტი 2023 წელს ეწურება და მის გახანგრძლივებას არ აპირებს, რადგან ესპანეთში დაბრუნება სურს. ფეხბურთელის წარმომადგენლებს სჯერათ, რომ რუისს “ბარსელონაში”, “რეალსა” და “ატლეტიკოში” თამაში შეუძლია.