როგორი იქნება ბარსა საულთან ერთად?

ესპანური გამოცემებისა და წყაროების ინფორმაციით, საულ ნიგესისა და ანტუან გრიზმანის გაცვლა ფაქტობრივად გარდაუვალია. გრიზმანის გაშვებით და საულის დამატებით “ბარსა” სახელფასო ფონდს დაახლოებით 12 მილიონით შეამსუბუქებს, ფონდის შემსუბუქება კი ამ ეტაპზე მესისთან ახალი კონტრაქტის გასაფორმებლად კატალონიელებისათვის უმთავრესი მიზანია.

საულის “ბარსელონაში” გადმოსვლის შემთხვევაში რონალდ კუმანს, შესაძლოა, ახალი ტაქტიკური მონახაზების მოსინჯვაც დასჭირდეს. ქვემოთ 3 სხვადასხვა ფორმაციას განვიხილავთ, სადაც შთაბეჭდილება საულ ნიგესის როლზეც შეგვექმნება.

ვარიანტი N1

საულ ნიგესი ეგრეთ წოდებული box to box ტიპის ნახევარმცველია, მაგრამ მას სერხიო ბუსკეტსის შემცვლელად თამაშიც თავისუფლად შეუძლია. 

26 წლის ფეხბურთელმა გასულ სეზონში რამდენიმე მატჩი ჩემპიონთა ლიგაზეც ჩაატარა, სადაც 1 თამაშში საშუალოდ 1.3 ვარდნა, ამდენივე სიტუაციის განმუხტვა და 2 ჩაჭრა ჰქონდა.

ბუსკეტსის შემცვლელად საულის ფიზიკური ძალა და აღნაგობა მნიშვნელოვანი ფაქტორი იქნება.

ვარიანტი N2

საული ცაციაა, რის გამოც მას ფრენკი დე იონგისთან ერთად ცენტრალური ნახევარდაცვის დუეტში (ოდნავ მარცხნივ) თამაში არ გაუჭირდება.

საულის ხარჯზე პედრის დასასვენებლად გარკვეული დროც ექნება. 18 წლის ბიჭს ჯერ კიდევ არ დაუსვენია და არც აპირებს. ის ეროვნული ნაკრების ღირსების დაცვას ოლიმპიადაზეც აპირებს.

ვარიანტი N3

დიეგო სიმეონე საულს ზოგჯერ განაპირა ნახევარმცველადაც იყენებდა. მას ჩაწოდება კარგად შეუძლია და სწორედ ამიტომ 3 ცენტრალური მცველით თამაშისას მას ჟორდი ალბას ჩანაცვლებაც შეეძლება. 

მე-3 ვარიანტი ყველაზე ნაკლებად სავარაუდოა და ალბათ თავდაპირველად მისი გამოყენება ზედმეტად ფორსირებული სიტუაციის დროს იქნება უპრიანი.