სტატისტიკა, რომელიც მიანიშნებს, რომ პედრი მწვრთნელების ნდობას ამართლებს

“ბარსელონას” ტალანტი, პედრი გონსალესი კატალონიელთა მთავარმა მწვრთნელმა, რონალდ კუმანმა მალევე შეამჩნია, რის შემდეგაც მას დიდი სათამაშო დრო გამოუყო და კლუბის ერთ-ერთ შეუცვლელ ფიგურად აქცია.

მსგავსი სიტუაციაა ესპანეთის ნაკრებშიც – ლუის ენრიკემ კანარელი მოთამაშე მსოფლიო ჩემპიონატის საკვალიფიკაციო ეტაპზე ჩატარებულ ორივე მატჩში ათამაშა, საქართველოს წინააღმდეგ გამართულ შეხვედრაში კი იგი ძირითად შემადგენლობაშიც ვიხილეთ (მან მოედანზე 90 წუთი დაჰყო).

Mundo Deportivo-ს ინფორმაციით, 18 წლის ფეხბურთელმა მიმდინარე სეზონში, კლუბისა და ნაკრების რიგებში, შესაძლო 45 დაპირისპირებიდან, მონაწილეობა 44 მატჩში მიიღო – 28 ლა ლიგაში, 7 ჩემპიონთა ლიგაზე, 5 კოპა დელ რეიზე, 2 ესპანეთის სუპერ თასზე, 2 კი – “ფურია როხას” მაისურით.

ერთადერთი ჯახი, რომელის დროსაც ახალგაზრდა ნახევარმცველი მოედანზე არ გასულა, ევროპის უპრესტიჟულესი საკლუბო ტურნირის ჯგუფურ სტადიაზე, “ფერენცვაროშთან” გასვლაზე ჩატარებული მატჩია, რომელიც “ბლაუგრანამ”, ანგარიშით, 3-0 მოიგო.

ჯამში, “ბარსას” მე-16 ნომერმა, 4110-დან, 2905 წუთი ითამაშა (71%) – ფაქტობრივად, შეგვიძლია ვთქვათ, რომ იგი 4 მატჩიდან 3-ში მონაწილეობს.

გარდა ამისა, ზემოხსენებული 44 შეხვედრიდან, პედრი სასტარტოში 32-ჯერ მოხვდა. თუმცა, უნდა აღინიშნოს, რომ ამ 32 დაპირისპირებიდან, გონსალესმა სრულად მხოლოდ 5 მატჩი ჩააატარა, – 4 პრიმერა დივიზიონში, 1 კი ჩემპიონთა ლიგაზე, “იუვენტუსის” წინააღმდეგ (ტურინში), – რაც ბუნებრივია, ვინაიდან, რონალდ კუმანს არ სურს, სადებიუტო სეზონში ახალგაზრდა შუახაზელი გადატვირთოს.

საინტერესოა, რომ “ლურჯ-ბროწეულისფერთა” ბანაკში გატარებული პირველი სეზონი, პოტენციურად, ყოფილი “ლას პალმასელისთვის” ძალიან ინტენსიური გამოვა – “ბარსელონას” ჯერ კიდევ 11 შეხვედრა (10 ლა ლიგაში, 1 კოპა დელ რეიზე) აქვს დარჩენილი. ამ ყველაფერს, შესაძლოა, ევროპის ჩემპიონატიც დაემატოს (რომელიც სტარტს მიმდინარე წლის ივნისში აიღებს და ივლისში დასრულდება), რასაც ტოკიოს ოლიმპიადა მოჰყვება – ივლისიდან 8 აგვისტომდე.