მატჩისშემდგომი მიმოხილვა: სულ რაღაც ოთხ ქულაში

სულ რაღაც 4 ქულაა სხვაობა, “ატლეტიკოს” ისე მივუახლოვდით, რომ ცხრილის სათავეში ხელსაც წამოვარტყამთ, როგორც წესი, ის უფრო ნერვიულობს, ვისაც მისდევენ და შეცდომებსაც უფრო მეტს უშვებს, ჩვენ კი ფეხის დაცდენის უფლება არ გვაქვს, ჯერ “კლასიკოს” თამაში მოგვიწევს, მერე კი “ატლეტიკოსთან” გვექნება საფინალო მატჩი და იმედი უნდა დავიტოვოთ, რომ ლუის სუარესს ოდნავ მაინც გადაუარა ბრაზმა, ან თუ არ გადაუარა, გოლს ნუ გვაკადრებს, ჯობია ლანგლე დაკბინოს. 

იქამდე მარათონია, ჩვენ “ატლეტიკოს” მივსდევთ, “რეალი” ჩვენ მოგვსდევს, ეს უფრო ძაბავს სიტუაციას, ალბათ აჯობებს მადრიდელებმა ჩემპიონთა ლიგაზე “ატალანტას” ბარიერი დაძლიონ, ჩვენი არ იყოს, სათადარიგოთა სკამზე მათაც პრობლემები აქვთ, ამიტომ, ორ ფრონზე ბრძოლა უნდა გაუჭირდეთ. 

ამასობაში, კარგი განწყობაა, ქულებს ვაგროვებთ, ხარისხს ვუმატებთ და “ბარსას” ყურება სასიამოვნო სანახავია. ვაქცინაციის პირობებში ალბათ სტადიონების კარებებიც მალე გაიხსნება, ჰოდა, სადღაც ბოლოსკენ, “ატლეტიკოსთან”, ხალხი თუ დაგვიჭრს მხარს, ამაზე მაგარი დასასრული ამ უცნაურ ჩემპიონატს ნამდვილად არ ექნება. 

დამაჯერებელი გამარჯვება

ისევ იგივე ტაქტიკა, ისევ დე იონგით დაცვის ცენტრში, უკვე სეზონის ბოლო ეტაპი იწყება და უნდა ითქვას, რომ ფრენკის კარგი სეზონი აქვს, იმაზე ბევრად მაგარი, ვიდრე წინა ჰქონდა, მთელი ჩემპიონატის მანძილზე, ხან ექვსიანზე ითამაშა, ხან რვიანზე, ხანაც დაცვის ცენტრში და საწყის ეტაპს თუ გავიხსენებთ, კუმანს ცრუ ცხრიანზეც აუწევია, ყველგან კარგი შთაბეჭდილება დატოვა, მეტ-ნაკლებად, ყველაზე მეტად რვიანზე მოგვაწონა თავი, რადგან, გუნდის შეტევის მნიშვნელოვანი ფიგურა გახდა, მისი შერბენებიც მეტწილად მისი სათამაშო აღქმის დამსახურებაა და არა კუმანის ტაქტიკური გათვლა, აგერ გუშინ, დაცვის ცენტრში იდგა და მაინც იპოვა მომენტი, რომ საჯარიმოში ტრადიციულად შეერბინა, პასიც კარგი იყო და რომ არა ხარიხა მორიგ გოლს გაიტანდა. ლამაზი ეპიზოდი გამოვიდა. 

სულ უფრო თავდაჯერებული ხდება სერჟინიო დესტი, შეგვიძლია ვთქვათ, რომ ადაპტაციის პერიოდმა ჩაიარა, ახლა სულ წინ და წინ ივლის, განვითარებისკენ, სამმცველიანი ტაქტიკაც მაგრად წაადგა, მუდმივად ჰყავს დამზღვევი მინგესას სახით, ამიტომ დაცვაში გული არ უსკდება კაცი მომატყუებს, ან ჩასვლას ვერ მოვასწრებო. 

მინგესა კი ნამდვილი აღმოჩენაა! არაუხოზე გვქონდა ინფორმაცია და ვიღაცებს მაგრადაც ეიმედებოდათ, დესტი “აიაქსიდან” მოვიდა და თავისთავად დიდი იმედებით შევხვდით, სხვა ტრანსფერებზე აღარც ვლაპარაკობ, აი მინგესა ასე უეცრად გამოჩნდა და გუნდის სრულფასოვან წევრად იქცა, ადვილი წარმოსადგენია ვარჯიშებზე რა დღეშია, თანაც, უნივერსალად ყალიბდება, ცენტრალურ მცველს, მარჯვნივაც შეუძლია თამაში, ეს კი ძალიან ბევრს ნიშნავს თანამედროვე ფეხბურთში. 

ჰოდა, მისი ჯერიც მოვიდა, მორიბას შემდეგ, მინგესამ შეაგდო, ახალგაზრდებს ვეღარ აჩერებენ. 

ერიკ გარსიას ადგილისთვის სერიოზული ბრძოლა მოუწევს, საერთოდ, თუ გარსია და ალაბა მოვიყვანეთ, დაცვაში ძალიან ბევრი რამ დალაგდება, თითქმის ყველაფერი, ვნახოთ ლაპორტა რას იზამს. 

მესი

ახალგაზრდებს ვეღარ აჩერებენ-მეთქი აღვნიშნე და.. მესი ისეთი ენერგიით თამაშობს სულ ახალბედა გგონია, გუშინაც შექმნა პატარა შედევრი, მისი სტანდარტებისთვის პატარა, თორემ გრიზმანის მომდევნო გასროლა ძალიან განსაკუთრებულ მოვლენად მომეჩვენა, აი მესის შემოტარებულ დარტყმას ისე მივეჩვიე, რომ ძალიან მიჭირს რამე გამიკვირდეს, უბრალოდ მიხარია, რომ ეს ზღაპარი გრძელდება. 

ცუდი მატჩი ჰქონდა დემბელეს, რაც გასაკვირი არ არის, იმ გუნდს ვეთამაშეთ ვინც ყველაზე უკნიდან თამაშობდა ვისთანაც აქამდე გვითამაშია, დემბელეს გასაქცევი სივრცე საერთოდ არ ჰქონია, უბრალოდ ყურადღებას იქცევდა და მის წინ სივრცეს ათავისუფლებდა, რითიც გრიზმანმა ისარგებლა კიდეც, აი მესის მაინც ფეხზე აჯდა მცველი, მაგრამ უკვე წლებია ეს არაფერს ცვლის. 

ბოლოსკენაც გაისროლა, ისევ ჩვეულად დაატრიალა, სუარესი კარგად ჩამოიტოვა და ახლა “ატლეტიკოს” მისდევს, ზვიგენივით არის, სისხლს რომ იგრძნობს მისი გაჩერება აღარ იქნება. 

ერთობ სასაცილო და სატირალი მომენტი

მეტოქემ კარგი კონტრშეტევა განახორციელა, კარგი პასიც გაკეთდა, მაგრამ თავდამსხმელმა ვერ მიუსწრო, ბურთი შტეგენსაც აცდა, სადღაც გვერდზე გაგორდა, უკვე ახალ შეტევას ვიწყებდით, როცა “უესკას” თავდამსხმელი შტეგენის შუა თითს წამოედო, მსაჯმა კი პენალტი დანიშნა. რაფა მირსაც კი გაუკვირდა, მაგრამ დიდი უნამუსო ბიჭი აღმოჩნდა, დაავლო ბურთს ხელი და ულაპარაკოდ გაგვიტანა. ასეა ძმაო, ფეხბურთი ცხოვრებას ჰგავს, ხანდახან უსამართლოა, მომავალში იქნებ ვიდეორეფერი ან რამე მსგავსი გამოიგონონო – მოგვაძახა და წაიღო ბურთი ცენტრისკენ. 

ასეთ დროს სულ პიკეზე მეფიქრება, ალბათ ძალიან უნდა, რომ “დატვიტოს”, წერს-შლის, წერს-შლის, “ტვიტავს” მსაჯებზე, ალბათ პერესზე, მთელ ლა ლიგაზე “ტვიტავს”! როგორც სჩვევია ხოლმე, აგრესიასაც გაურევს – სეზონის ბოლოს მაინც ყველას “დაგტვიტავთ!” სასაცილოა იმიტომ, რომ “უესკა” იყო ჩვენი მეტოქე, აბა “ატლეტიკოსთან”, ან “კლასიკოში”, რომ ასეთი რამ დაგვმართონ, სატირლად გვექნება საქმე. 

მესი ჩავის გაუთანაბრდა

ჩატარებული თამაშების რაოდენობით ჩავის გაუთანაბრდა და უკვე ძალიან რთულია მესისთვის რაიმე მოტივაცია იპოვოს, უმაღლეს მწვერვალზეა ასული და ყველას იქიდან გადმოჰყურებს, თუმცა, მაინც ახერხებს ხოლმე მოტივირებას, სხვები ცდილობენ, რომ ჩამოაგდონ და არაფრის დიდებით არ ჩამოდის. 

შემდეგი მატჩი “სოსიედადთან” გვაქვს გასვლაზე, იქ თამაში კიდე მაგრად გვიჭირს. ჩემპიონთა ლიგიდან გამოვარდნა დასვენების საშუალებას მოგვცემს, ამასობაში სანაკრებო პაუზაც მოახლოვდება, ევროპელები ითამაშებენ, სამხრეთ ამერიკელები – არა, მესი და სუარესი ალბათ ერთად დაისვენებენ და სამომავლო დაპირისპირებაზეც ჩამოაგდებენ სიტყვას. 

ყველაფერი კარგად მიდის, ბოლომდე ვიბრძოლებთ, ჩემპიონობა რეალურია.