ლა ლიგის მე-20 ტურის მატჩს “ბარსა” მარტინეს ვალეროს სახელობის სტადიონზე, “ელჩეს” წინააღმდეგ გამართავს.

კატალონიელების დანაკლისი განსაკუთრებით სერიოზულია. ფატის, პიკეს, რობერტოსა და კოუტინიოს ლიონელ მესი და სერჟინიო დესტი შეურთდნენ.

არგენტინელი 10-იანის არყოფნა შეტევითი თვალსაზრისით რთული აღმოსაფხვრელი იქნება, შესაბამისად კუმანს მოედანზე კრეატიული ფეხბურთელების გამოყვანა მოუწევს.

ქვემოთ 3 სახის ტაქტიკურ მონახაზს განვიხილავთ, რომელთაგან ერთ-ერთსაც, შესაძლოა, ნიდერლანდელი სპეციალისტი ენდოს.

ვარიანტი N1

სერჟინიო დესტისა და სერჟი რობერტოს ტრავმიანობიდან გამომდინარე, დიდი ალბათობით, ოსკარ მინგესას მარჯვენა მცველის პოზიციაზე ვიხილავთ.

წინა შეხვედრაში დასვენების შემდეგ, ფრენკი დე იონგი და პედრი ნახევარდაცვის ხაზს დაუბრუნდებიან.

ლეო მესის დისკვალიფიკაციის პირობებში კი შემტევ ტრიოს ანტუან გრიზმანი, მარტინ ბრეითუეიტი და უსმან დემბელე დააკომპლექტებენ.

ვარიანტი N2

რონალდ არაუხომ ზედიზედ სამ 120-წუთიან შეხვედრაში მონაწილეობა სრულად მიიღო, ამიტომ ლოგიკური იქნება, თუ კუმანი მას დასასვენებლად დროს მისცემს.

თუ გამოუყენებელ თერთმეტრიანს არ ჩავთვლით, მირალემ პიანიჩი წინა შეხვედრაში საყრდენის პოზიციაზე მშვენივრად გამოიყურებოდა და მოულოდნელი არ იქნება, თუ კუმანი მას სერხიო ბუსკეტსის ნაცვლად ისევ განამწესებს.

ზედიზედ 13-თამაშში სათადარიგოთა სკამიდან ჩართვის შემდეგ, ფრანსიშკუ ტრინკაუმ, შესაძლოა, ლა ლიგაში ძირითადიდან პირველად დაიწყოს. ამ შემთხვევაში გრიზმანი ცენტრალური თავდამსხმელის პოზიციაზე მოგვევლინება.

ვარიანტი N3

ამ შემთხვევაში უკვე რიკი პუჩისა და პედრის ერთად ხილვის საშუალება მოგვეცემა, რითიც შეტევას კრეატივი შეემატება. პედრი მარცხენა გარემარბის პოზიციას დაიკავებს, პუჩი კი შუა ხაზში დადგება.

მარჯვენა მცველის პოზიციაზე ჟუნიორ ფირპოს ვიხილავთ, რომელმაც ამ ამპლუით “სოსიედადთან”, ესპანეთის სუპერ თასზე ითამაშა.