ახალგაზრდა ამერიკელები “ბარსელონას” რადარზე

“ბარსელონა” ჩრდილოეთ ამერიკას მეტ ყურადღებას უთმობს – ESPN წერს, რომ კატალონიური კლუბის სკაუტები აშშ-ისა და კანადის აკადემიების მოთამაშეებს აკვირდებიან და რამდენიმე მათგანის ესპანეთში გადმოყვანით უკვე დაინტერესებულები არიან. 

პრესაში გავრცელებულ ცნობაში საუბარი შემდეგ ფეხბურთელებზეა:

ბრენდენ აარონსონი (“ფილადელფია იუნიონი”) – 19 წლის ფეხბურთელი შემტევი ნახევარმცველის პოზიციაზე თამაშობს და MLS-ის გარდა (სადაც წინა სეზონის სიმბოლურ გუნდში მოხვდა) შტატების ეროვნულ ნაკრებში გამოსვლის გამოცდილებაც აქვს. მას “რედ ბულ ზალცბურგსაც” უკავშირებენ და დიდი ალბათობით, კარიერას ევროპაში მალე გააგრძელებს. 

ჯანლუკა ბუზიო (“კანზას სიტი”) – 18 წლის იტალიელი წარმომავლობის ამერიკელი ფორვარდი “კანზასის” აღზრდილია. ასაკის მიუხედავად, მან ჩემპიონატში 44-ჯერ უკვე ითამაშა და აშშ-ს ახალგაზრდული ნაკრებების წევრიცაა. 

კეიდ ქაუელი (“სან ხოსე”) – ამერიკელი ვინგერი “ბარსას” სამიზნეებს შორის ყველაზე ახალგაზრდაა: ის 17 წლის სულ რამდენიმე დღის წინ გახდა. ქაუელი “ერთქუეიქსის” ღირსებას 2019 წლიდან იცავს, MLS-ში დებიუტი კი ერთი თვის წინ ჰქონდა, ქართველ თანაგუნდელებთან ერთად და ამ მატჩში გოლის გატანაც შეძლო.