“ბარსამ” ერთი წლით მოცდა გადაწყვიტა

როგორც მოსალოდნელი იყო, შეიხი მანსური “ბარსელონაზე”, ერიკ გარსიას მეშვეობით შურისძიებას აპირებს. მანსური ის კაცია, რომელსაც მიაჩნია, რომ ფულით ყველაფრის ყიდვა შეიძლება, ამის მაგალითი სულ ცოტა ხნის წინ ვიხილეთ, როცა “სიტის” აშკარა დარღვევაზე თვალი დახუჭეს, ბანი მოუხსნეს და მხოლოდ ჯარიმა აკმარეს.

ამ ყველაფრისთვის მანსურმა დიდი თანხა გაიღო, უფრო სწორად, ეს თანხა დიდი სხვა კლუბებისთვის ჩანს, ხოლო მისთვის არაფერია, ზღვაში წვეთია.

ამიტომ, ვერ აქვს ნერვები წესრიგში, მას შემდეგ რაც ლიონელ მესის ხელში ჩაგდება ვერ მოახერხა. ძალიან ახლოს იყო ამასთან, თავად მესიც მზად იყო წასასვლელად, მაგრამ ლეო კონტრაქტის მეშვეობით დააბეს, მანსურმა კი გაიგო, რომ თურმე არსებობს შემთხვევები, როცა ფული ვერ გიშველის.

ერთი სიტყვით, ძალიან ძლიერი სილა მოხვდა სახეში. ახლა კი “ბარსას” მიზერულ ფასად სურს ცენტრალური მცველის გადაბირება, რომელსაც თავადაც აქვს სურვილი, კატალონიას დაუბრუნდეს, მხოლოდ ერთი წელი აქვს დარჩენილი და ამ პირობების მიუხედავად, “სიტი” 30 მილიონ ევროს ითხოვს, იმაზე მეტს, ვიდრე “ლიონი” ითხოვს დეპაიში, არადა “ბარსას” შეთავაზება პირველ ჯერზე, მხოლოდ 10 მილიონი ევრო იყო.

Marca იუწყება, რომ “ბარსამ” ერთი წლით მოცდა გადაწყვიტა, ერთი წლის შემდეგ ფეხბურთელს უფასოდ ჩაიგდებს ხელში, მაგრამ ვინ უფრო მეტს დაკარგავს ამით? “ბარსა” დაკარგავს უმნიშვნელოვანეს ფეხბურთელს, რადგან აუცილებლად სჭირდება ცენტრალური მცველი, დაკარგავს თუნდაც ერთი წლით, მაგრამ სწორედ ეს ერთი წელია გარდამტეხი, ხოლო “სიტი” დაკარგავს პოტენციურ 15 მილიონ ევროს, რაც მათთვის უბრალოდ ხურდა ფულია.