ლუის სუარესი ორშაბათს დაბრუნდება

Mundo Deportivo-ს ცნობით, ლუის სუარესი ახალი კვირიდან ჯგუფურ ვარჯიშებს უკვე სრული დატვირთვით შეუერთდება. 

ორშაბათს, “ბარსელონას” სამედიცინო დეპარტამენტისგან ურუგვაელი, დიდი ალბათობით, საბოლოო ნებართვას მიიღებს, რითაც 4 თვიან სარეაბილიტაციო პერიოდს სრულად ჩაამთავრებს. 

ლუისის დაბრუნება “ბარსას” შეტევისათვის ლა ლიგის მომდევნო 11 მატჩის ფონზე, რა თქმა უნდა, მნიშვნელოვანი იქნება.

შეგახსენებთ, რომ სუარესმა მუხლზე ოპერაცია იანვარში გაიკეთა. წინასწარი ინფორმაციით, მას აღდგენითი ვარჯიშების დაწყება ადრეულ მაისში შეეძლებოდა, თუმცა, საბედნიეროდ, ურუგვაელს აპრილში სირბილი უკვე შეეძლო.

კორონავირუსული პანდემიის გამო არსებულმა შეჩერებამ, “ელ პისტოლეროს” დაბრუნების მხრივ, დადებითად იმოქმედა. იგი მესისთან ერთად “ბარსელონას” შეტევის ლიდერია.

მიმდინარე სეზონში ჩატარებულ 23 შეხვედრაში “ბლაუგრანას” 9-იანის ანგარიშზე 14 გოლი და 11 ასისტია.