ვერნერი გამოირიცხა – ვინ იქნებიან “ბარსას” პრიორიტეტები

კორონავირუსის პანდემიის გამო, “ბარსელონამ” 60 მილიონი იზარალა. რა თქმა უნდა, შემცირებული ბიუჯეტი კლუბის სატრანსფერო პოლიტიკაზე უარყოფითად აისახება.

Mundo Deportivo-ს ცნობით, კატალონიელებმა “რედ ბულ ლაიფციგის” ფორვარდის, ტიმო ვერნერის ტრანსფერი გამორიცხეს. შესაბამისად, მომდევნო სატრანსფერო ფანჯარაზე პრიორიტეტული მხოლოდ ორი ფეხბურთელი იქნება – ლაუტარო მარტინესი და ნეიმარი.

რაც შეეხება ვერნერს, როგორც ინფორმაცია გავრცელდა, ის “ინტერსა” (სწორედ ლაუტაროს შემცვლელად) და კლოპის “ლივერპულს” სურთ.

საინტერესოა, რომ შედარებით ნაკლებფასიანი მოთამაშეები კატალონიელთათვის უფრო ხელსაყრელები იქნებიან. მაგალითად, ვრცელდება ცნობები ვილიანთან დაკავშირებით, რომელსაც “ჩელსისთან” კონტრაქტი ივნისში ეწურება. არის კიდევ ერთი ვარიანტი – “ბაიერნის” უნივერსალი, დავიდ ალაბა, რომლითაც კატალონიური კლუბი ადრეც ინტერესდებოდა.

შესაძლოა, ბიუჯეტური კრიზისის გამო კლუბმა მცველებისათვის ბრძოლაზე უარი თქვას. მათ შორის არიან: დაიო უპამეკანო (“ლაიფციგი”), დანიელე რუგანი (“იუვენტუსი”) და, 20 წლის უნიჭიერესი უკანახაზელი, ალესანდრო ბასტონი (“ინტერი”).

ასევე “ბარსელონასთვის” მიუწვდომელი იქნება “ბაიერ ლევერკუზენის” 20 წლის ლიდერი, კაი ჰავერტცი, რომელიც 100 მილიონ ევროდაა შეფასებული.