ხვალ ჩემპიონთა ლიგა იწყება. “ბარსელონას” ჯგუფში “დორტმუნდი”, “ინტერი” და პრაღის “სლავია” მოხვდა. აღსანიშნავია, რომ გასულ უქმეებზე, შიდა ასპარეზზე, სამივე გუნდმა მშრალად მოიგო.
“დორტმუნდი” მოგებით დაბრუნდა (4-0)
გერმანულმა გუნდმა, “ბარსას” პირველმა მოწინააღმდეგემ ჩემპიონთა ლიგაზე, ბუნდესლიგაში, მესამე მოგება მიითვალა. “დორტმუნდმა” “ბაიერს” ანგარიშით 4-0 სძლია. “სიგნალ იდუნა პარკზე” პირველი გოლი პაკო ალკასერმა გაიტანა, მარკო როისმა დუბლი გაიფორმა, ხოლო 1 გოლი ანგარიშზე რაფაელ გერეირომ ჩაიწერა. სამშაბათს, 17 სექტემბერს “ბლაუგრანა” გერმანიაში გაემგზავრება, რათა ლუსიენ ფავრის გუნდს 2019/2020 წლის ჯგუფურ ეტაპზე დაუპირისპირდეს.
“ინტერი” მოგებას განაგრძობს (1-0)
სენსის წარმოუდგენელი გოლით “ინტერმა” კვლავ იმარჯვა და სერია A-ს სათავეში ერთპიროვნულად მოექცა. ანტონიო კონტეს შეგირდებმა ჩემპიონატის სამი თამაში ითამაშეს და მათგან ყველა მოიგეს: პირველი “ლეჩეს” წინააღმდეგ, ანგარიშით 4-0; მეორე “კალიარისთან”, 2-1 და 1-0 “უდინეზეს” წინააღმდეგ. ჯგუფურ ეტაპზე მათი პირველი შეხვედრა “ბარსასთან” 20 ოქტომბერს გაიმართება.
“სლავია პრაღა” წაუგებელი ლიდერია (3-0)
ჩემპიონთა ლიგის მესამე მეტოქემ ჩეხეთის ჩემპიონატის მეცხრე ტურში მოიგო. ჰაშბაუერის, კუფალისა და პროვოდის გოლებით გუნდმა 3-0 იმარჯვა და მეშვიდე მოგება მიითვალა. 9 თამაშიდან, 2 ფრედ დასრულდა და 23 ქულით ისინი ლიდერები არიან.
