სად ითამაშებს “ბარსა ბ” მომდევნო სეზონში?

წარუმატებელი სეზონის შემდეგ, “ბარსელონას” მთავარი სარეზერვო გუნდი სეგუნდა დივიზიონიდან ესპანეთის რანგით მესამე ლიგაში დაქვეითდა, რომელშიც არც ისე დიდი ხნის წინ თამაშობდა.

“ბარსა ბ”-ს შედეგს, ზოგადად, არც ისე დიდი მნიშვნელობა ენიჭება, თუმცა ფეხბურთელებისთვის გამოცდილების მისაღებათ უკეთესია, თუ მათი მეტოქეები საშუალოზე მაღალი დონის მაინც იქნებიან. წელს, კატალონიელებს ამის ფუფუნება არ ექნებათ და უნდა მოახერხონ, კვლავ აღზევდნენ იქ, სადაც წესით მათი ადგილი უნდა იყოს.

სეგუნდა დივიზიონ ბ-ში სულ 80 კლუბი გამოდის. ჩემპიონატი ოთხ ჯგუფადაა დაყოფილი, რომლებშიც გუნდები რეგიონების მიხედვით არიან განაწილებული. “ბარსა ბ” მესამე ჯგუფშია, სადაც ძირითადად კატალონიური, არაგონული და ვალენსიური გუნდები გამოდიან, მათ შორის “ესპანიოლის”, “ლევანტეს”, “ვალენსიას” და “ვილიარეალის” სარეზერვო გუნდები. თითო წარმომადგენელი კასტილია-ლა მანჩას (“კონკენსე”) და კუნძულ მალიორკასაც (“ატლეტიკო ბალეარესი”) ჰყავს. ასე რომ, ამ ჩემპიონატში “ელ კლასიკო ბ” ვერასდროს შედგება, ეს მხოლოდ სეგუნდაში შეიძლება მოხდეს. 

სეგუნდა ბ-დან ამოსვლა დაახლოებით ისეთი სირთულისაა, როგორიც ლა ლიგის მოგება. სასურველი შედეგი კლუბებს საკუთარი ჯგუფის მოგების შემდეგაც კი არ აქვთ გარანტირებული: მათ პლეი-ოფის სისტემით ურთიერთობა დანარჩენ სამ გამარჯვებულთან უნდა გაარკვიონ, ამათგან კი რანგით მეორე ლიგის საგზურს მხოლოდ ორი მოიპოვებს. 

აღზევების შანსი აქვთ ჯგუფში მეორე, მესამე და მეოთხე ადგილზე გასულ კლუბებსაც. სულ, ასეთი 12 გროვდება და საგზურს მხოლოდ ორი იღებს. 

რაც შეეხება გავარდნას, ბოლო 4 პოზიციაზე გასული გუნდები ავტომატურად ტერსერა დივიზიონში გადადიან, ისინი კი, ვინც მე-16 ადგილს დაიკავებენ, დარჩენისთვის იბრძოლებენ. 

“ბარსა ბ” სეზონის პირველ მატჩს 26 აგვისტოს, სტუმრად, “ალკოიანოს” წინააღმდეგ გამართავს.