დანიელე მასარო: პუჩი შემიყვარდა. ის ამტკიცებს, რომ კრუიფის საქმე გრძელდება

იტალიური “მილანის” ლეგენდა დანიელე მასარო, “ბარსელონასთან” გუშინ გამართული შეხვედრის შემდეგ, კატალონიელთა ამომავალ ვარსკვლავს, რიკი პუჩს შეხვდა და მასზე ჟურნალისტებთანაც ისაუბრა.

“რიკი პუჩის მსგავსი ფეხბურთლების თამაში ამტკიცებს, რომ იოჰან კრუიფის მიერ დაწყებული საქმე გრძელდება. “ბარსელონა” ყოველთვის დიდ ყურადღებას აქცევს მაღალი დონის ახალგაზრდებს და მათ პირველ გუნდში გასაბრწყინებლად ზრდის.

რიკი შემიყვარდა. მას საკუთარი სტილი აქვს და ის ყოველთვის თავაწეული თამაშობს. მას შეუძლია ახალი ანდრეს ინიესტა გახდეს.” – ციტირებს იტალიელის სიტყვებს “ბარსელონას” ოფიციალური ვებგვერდი.

მასაროსთან შეხვედრის შემდეგ კომენტარი თავად პუჩმაც გააკეთა: “მამამ მითხრა, რომ ჩემპიონთა ლიგის 1994 წლის ფინალში, მასარომ “ბარსელონას” 2 გოლი გაუტანა და რომ ის ფეხბურთის ლეგენდაა.

მასარომ მითხრა, რომ მას ჩემი თამაშის სტილი მოსწონს.”