ფერმინ ლოპესის მიმართ ინგლისური კლუბების ინტერესი სულ უფრო იზრდება. გამოცემა SPORT-ის ინფორმაციით, “ბარსელონამ” პრემიერ ლიგის ოთხი კლუბისგან მიიღო შეთავაზებები, რომელთა ღირებულებაც 100 მილიონ ევროს აღწევს.
ყველაზე დიდ ინტერესს “ჩელსი” და “მანჩესტერ იუნაიტედი” იჩენენ. ორივე კლუბს ესპანელი ნახევარმცველის გადაბირება სურს, თუმცა ფერმინი “ბარსელონადან” წასვლას არ განიხილავს. დანარჩენი ორი ინგლისური კლუბის ვინაობა ჯერჯერობით უცნობია.
მიუხედავად მნიშვნელოვანი ფინანსური წინადადებებისა, კატალონიური კლუბი ფეხბურთელის შენარჩუნებას გეგმავს. უფრო მეტიც, “ბარსელონას” ხელმძღვანელობას ფერმინთან მოლაპარაკებების გამართვა და მისი კონტრაქტის ფინანსური პირობების გაუმჯობესება სურს.
აღსანიშნავია, რომ 23 წლის ნახევარმცველმა “ბარსელონასთან” ხელშეკრულება 2026 წლის თებერვალში გაახანგრძლივა და მისი მოქმედების ვადა 2031 წლის 30 ივნისამდე განისაზღვრა. მიუხედავად გრძელვადიანი კონტრაქტისა, კლუბი ფეხბურთელის მნიშვნელობის გათვალისწინებით პირობების ხელახლა გადახედვას აპირებს.
თავად ფერმინმა “მანჩესტერ იუნაიტედის” ინტერესთან დაკავშირებით პოზიცია თვის დასაწყისშიც დააფიქსირა. როგორც Mundo Deportivo იტყობინებოდა, ფეხბურთელმა განაცხადა:
“ასეთ ცნობებს ყურადღებას არ ვაქცევ. მინდა, “ბარსელონაში” რაც შეიძლება დიდხანს დავრჩე და იმედი მაქვს, კარიერას ამ კლუბში დავასრულებ.”
ამრიგად, პრემიერ ლიგის კლუბების ინტერესის მიუხედავად, ფერმინ ლოპესის პრიორიტეტი კვლავ “ბარსელონაში” დარჩენაა.
forum კომენტარები (0)