“ბარსელონამ” ლა ლიგის მე-12 ტურში ძალიან მნიშვნელოვანი გამარჯვება მოიპოვა. ჰანსი ფლიკის გუნდმა მადრიდში, “მეტროპოლიტანოზე”, “ატლეტიკო” 2-1 დაამარცხა და სანაკრებო მატჩებით გამოწვეულ პაუზას ესპანეთის ჩემპიონატის ლიდერის სტატუსით შეხვდა. შეხვედრის მთავარი გმირი ფერმინ ლოპესი გახდა, რომელმაც ორი გოლი გაიტანა.
მატჩის საწყისი ნახევარი საათი მასპინძლების უპირატესობით წარიმართა. დიეგო სიმეონეს გუნდმა ორგანიზებული პრესინგითა და ბურთის სწრაფი გადაადგილებით “ბარსელონას” პრობლემები შეუქმნა. განსაკუთრებით უჭირდა ჟოაუ კანსელუს, რომლის პოზიციური შეცდომებითაც მადრიდელებმა არაერთხელ ისარგებლეს.
მე-6 წუთზე ხულიან ალვარესი ჟოან გარსიასთან პირისპირ აღმოჩნდა, თუმცა მეკარეს ვერ აჯობა. მომდევნო კუთხურის შემდეგ მარკ პუბილმა ბურთი ხარიხას მოარტყა. ერთი წუთის შემდეგ “ბარსელონამაც” უპასუხა: ლამინ იამალთან კომბინაციის შემდეგ პედრის დარტყმული ასევე ხარიხას მოხვდა.
მე-10 წუთზე “ატლეტიკომ” უპირატესობა გოლად აქცია. კანსელუს მორიგი წარუმატებელი მოქმედების შემდეგ ხულიან ალვარესმა მარცხენა ფლანგიდან საჯარიმოში ჩააწოდა, ხოლო ჯულიანო სიმეონემ ახლო მანძილიდან ანგარიში გახსნა.
ფერმინმა ბარსელონა თამაშში დააბრუნა
გაშვებული გოლის შემდეგ კატალონიელებმა თანდათან მოახერხეს თამაშის გაკონტროლება. განსაკუთრებით აქტიური იყო ლამინ იამალი, რომელიც ალეხანდრო გრიმალდოს წინააღმდეგ არაერთ სახიფათო შეტევას ქმნიდა.
პირველი ტაიმის მიწურულს “ბარსელონამ” უპირატესობა მოიპოვა და 45-ე წუთზე ანგარიშიც გაათანაბრა. პედრის მიერ განვითარებული შეტევის შემდეგ ბურთი მცველს მოხვდა და ფერმინ ლოპესთან აღმოჩნდა. ესპანელმა ნახევარმცველმა მარცხენა ფეხით ზუსტად დაარტყა და ტაიმი ფრედ, 1-1 დასრულდა.
ფლიკის ტაქტიკურმა ცვლილებამ შედეგი გამოიღო
მეორე ტაიმის დასაწყისში ჰანსი ფლიკმა უჩვეულო ტაქტიკური გადაწყვეტილება მიიღო. ბრიან ფარინიასი ფრენკი დე იონგით შეცვალა, თუმცა ნიდერლანდელი მარკ ბერნალის ნაცვლად საყრდენ ზონაში არ განაწესა.
დე იონგი დაცვის დროს მარჯვენა მცველის ფუნქციას ასრულებდა, შეტევისას კი ნახევარდაცვაში ინაცვლებდა. ამ ცვლილებამ “ბარსელონას” ბურთის კონტროლისა და შეტევების ორგანიზების შესაძლებლობა გაუუმჯობესა.
კატალონიელებმა მეორე ტაიმი აქტიურად დაიწყეს. ლამინ იამალსა და პედრის შორეული დარტყმებით გოლის გატანის შესაძლებლობა ჰქონდათ, თუმცა “ატლეტიკოც” სახიფათოდ პასუხობდა. ერთ-ერთ ეპიზოდში ხულიან ალვარესი კვლავ ჟოან გარსიასთან პირისპირ აღმოჩნდა, მაგრამ მეკარის თავზე ბურთის გადაგდება ვერ მოახერხა.
მე-60 წუთზე ფლიკმა კანსელუ ანდრეას კრისტენსენით შეცვალა. დანიელი დაცვის ცენტრში დადგა, ჟერარ მარტინი კი მარცხენა მცველის პოზიციაზე გადავიდა.
გარდამტეხი ეპიზოდი 66-ე წუთზე დადგა. ლამინ იამალმა მეტოქის მცველებს შორის თავისუფალ სივრცეში ფერმინ ლოპესი შენიშნა და ზუსტი გადაცემით მეკარესთან პირისპირ გაიყვანა. ფერმინმა შანსი გამოიყენა, ბურთი კარის შორეულ კუთხეში გადაგზავნა და “ბარსელონა” დააწინაურა – 2-1.
ბარსელონამ უპირატესობა ბოლომდე შეინარჩუნა
მატჩის დასკვნით მონაკვეთში ფლიკმა კიდევ რამდენიმე ცვლილება განახორციელა. მოედანზე ერიკ გარსია და გავი გამოჩნდნენ, დე იონგი კი მისთვის ჩვეულ ნახევარდაცვის პოზიციას დაუბრუნდა.
83-ე წუთზე “ბარსელონას” მესამე გოლის გატანაც შეეძლო. ენტონი გორდონის მარცხენა ფლანგიდან განვითარებული შეტევის შემდეგ ლამინ იამალმა ახლო მანძილიდან ვერ გაიტანა.
მიუხედავად ამისა, სტუმრებმა დარჩენილ დროში თამაშის ტემპი წარმატებით გააკონტროლეს და “ატლეტიკოს” ანგარიშის გათანაბრების შესაძლებლობა არ მისცეს.
ამ გამარჯვებით “ბარსელონამ” 33 ქულა დააგროვა და სანაკრებო პაუზამდე ლა ლიგის პირველ ადგილზე დარჩა.
მატჩის საუკეთესო ფეხბურთელი ფერმინ ლოპესი გახდა, რომლის დუბლმაც “ბარსელონას” სეზონის ერთ-ერთ ყველაზე რთულ გასვლით შეხვედრაში სამი ქულა მოუტანა.
დაცვის ხაზია დასაწევი დაბლა, სხვა გზა ფიზიკურად არ არის.
კაროჩეე დაცვა თუ მოხოდეს ამ ზამთარს ბასტონი, შლოტერბეკი ვინმე 2 უნდა იყიდონ და 3 მცველზე გადავიდნენ კუბარსისთან ერთად…3 4 3 ანუ ცენტრი როდრი, პედრი, დეიონგი, ფერმინი/ოლმო რავი ასეთი შემადგენლობა გაასწორებს დიდ მატჩებში
დაცვაზე მისახედია აუცილებლად! ბევრჯერ უბრალოდ გაგვიმართლა. ეს არაუხო აქ იყო და ყოველ თამაშში ერთი სერიოზული შეცდომა არ დაეშვა არ იქნებოდა, ლივერში თვის საუკეთესო ფეხბურთელი გახდა!?
აბა რას ვშვრებით? ვუშვებთ ფლიკს? თუ ცოტაც ვაცალოთ? ხო ლოპესში 140 მილიონს იხდიან და გავყიდოთ?
გრიმალდო, რომ იბრიქებოდა, როგორც ვივარაუდე დააკავეს თუ არა სამში გრძელი?