ლამინ იამალის “ოქროს ბურთის” კანდიდატურას მხარდამჭერები კვლავ ემატება. ამჯერად საკუთარი პოზიცია “ბარსელონას” ყოფილმა თავდამსხმელმა სამუელ ეტოომ Instagram-ზე გამოქვეყნებული პოსტით დააფიქსირა. კამერუნელმა აღნიშნა, რომ “ბლაუგრანას” ათიანი “ჩვენი გულების ოქროს ბურთია” და ხაზი გაუსვა, რომ მან ეს ჯილდო 26 ოქტომბერს ლონდონში აუცილებლად უნდა მიიღოს.
“გენიოსი, გაბედული, ნიჭიერი… წარმატებებს გისურვებ ‘ოქროს ბურთისთვის’ ბრძოლაში. მაგრამ როგორიც არ უნდა იყოს ვერდიქტი, ერთი რამ უკვე უდავოა: ისევე როგორც უსმანი, შენ უკვე ხარ ჩვენი გულების ‘ოქროს ბურთი’. გააგრძელე ჩვენი ოცნებების ახდენა”, – დაწერა ეტოომ და თან გასული სეზონის ჩემპიონთა ლიგის მატჩიდან ლამინ იამალის ფოტო დაურთო.
ეტოოს პუბლიკაციას “ბარსელონას” სპორტული დირექტორი და კამერუნელის ახლო მეგობარი დეკუც გამოეხმაურა – ტაშითა და გულებიანი ემოჯებით.
“ოქროს ბურთის” გამოკითხვა ორშაბათს, 28 სექტემბერს იხურება. შეგახსენებთ, რომ ხმის მიცემისას მხოლოდ გასული სეზონის სტარტიდან მსოფლიო ჩემპიონატის ფინალამდე მიღწეული შედეგები ითვლება. წინა სეზონში დაკავებული მეორე ადგილის შემდეგ, ლამინ იამალი პრესტიჟული ჯილდოს მოპოვების ერთ-ერთი მთავარი ფავორიტია.
forum კომენტარები (0)