ბარსელონა – რაიო | ჰანსი ფლიკი მატჩის წინ

ლა ლიგის მე-3 ტურში “რაიო ვალეკანოსთან” გასამართი მატჩის წინ “ბარსელონას” მთავარმა მწვრთნელმა, ჰანსი ფლიკმა პრესკონფერენცია გამართა და გუნდში არსებულ ვითარებაზე, ინდივიდუალურ მოთამაშეებსა და სატრანსფერო სიახლეებზე ისაუბრა.

ლამინ იამალი და შემტევი ხაზი

ფლიკმა ხაზი გაუსვა ლამინ იამალის პროგრესს და მის დატვირთვას მსოფლიო ჩემპიონატის შემდეგ:

“კარგია, როცა ფეხბურთელი იღიმის, მაგრამ ყოველთვის ასე ვერ იქნება. ლამინმა მუნდიალზე ითამაშა და სამკვირიანი შვებულების შემდეგ დაბრუნდა. ‘ელჩესთან’ მისი საუკეთესო მატჩი არ ყოფილა, მაგრამ გუნდისთვის იმუშავა და ძალიან კმაყოფილი ვიყავი. ‘ატლეტიკის’ წინააღმდეგ მან 90 წუთი ითამაშა და შესანიშნავი იყო მისი კვლავ უმაღლეს დონეზე ხილვა. ვარჯიშებზე ის ბრწყინვალეა. მას მხარი უნდა დავუჭიროთ.”

რაფინიას ცრუ ცხრიანის პოზიციაზე გამწესებაზე მწვრთნელმა აღნიშნა:

“როგორც ‘ცხრიანი’, ის ყოველთვის იწყებს პრესინგს და ეს ძალიან კარგია. ის ჩვენი ლიდერია, მისი დინამიზმით დაწყებული ინტენსივობა კი ფანტასტიკურია, ისევე როგორც გატანის უნარი. მატჩის სხვადასხვა მონაკვეთში ამ პოზიციაზე სათამაშოდ სხვა ფეხბურთელებიც გვყავს.”

ჰამზა აბდელკარიმის სათამაშო დროზე ფლიკმა დასძინა:

“მისნაირ მოთამაშეებს, რომლებიც ამას იმსახურებენ, ყოველთვის ადვილი არ არის შანსი მისცე. მან შესანიშნავი წინასასეზონო ეტაპი ჩაატარა და ვარჯიშებზე ყოველდღიურად უმატებს. იტანს გოლებს, აქვს კარგი დამოკიდებულება და სწორი მენტალიტეტი. ის თამაშს იმსახურებს და გვინდა მივცეთ შანსი, რათა თავისი ხარისხი აჩვენოს.”

ტრანსფერები, როდრი და ალვარო კორტესი

სატრანსფერო ფანჯრის ბოლო დღეებსა და ცენტრალური მცველის შესაძლო დამატებაზე გერმანელმა სპეციალისტმა განაცხადა:

“სატრანსფერო ფანჯარა ჯერ კიდევ ღიაა და ამას ვერ შევცვლი. ჩვენ ყოველთვის ვაკვირდებით, რისი გაკეთებაა შესაძლებელი და ბოლო დღემდე ვნახავთ. რაც შეეხება ალვარო კორტესს, მან წინ ნაბიჯი გადადგა. მის ასაკში უმაღლეს დონეზე თამაში კარგია, შესაძლოა ბელგიაში, რადგან ასე უფრო განვითარდება. მისთვის სარეზერვო გუნდში კიდევ ერთი წლით დარჩენა ვარიანტი არ არის და საუკეთესო სხვა კლუბში წასვლაა.”

როდრისა და ბრიან ფარინიასის შესახებ მწვრთნელმა განმარტა:

“როდრის ამ დღეებში გარკვეული პრობლემები ჰქონდა, მაგრამ მდგომარეობა გაუუმჯობესდა და შესაძლოა სასტარტოშიც იყოს, თუმცა გადაწყვეტილებას ხვალ მივიღებთ. რაც შეეხება ბრიანს, მან წინასასეზონო ეტაპზე გამაოცა. დიდი ტალანტია, საქმისადმი უდიდესი ერთგულება აქვს და რამდენიმე პოზიციაზე თამაში შეუძლია. ფანტასტიკურია იმის ყურება, თუ როგორ მოუმატა. მის პოზიციაზე შესანიშნავი ფეხბურთელები არიან და მისთვის ადვილი არ არის, მაგრამ თამაშს იმსახურებს.”

მეკარეები, ფრენკი დე იონგი და ოქროს ბურთი

დომინიკ ლივაკოვიჩის როლზე საუბრისას ფლიკმა ვოიცეხ შჩესნის ფაქტორიც ახსენა:

“ჩვენ ტეკით (შჩესნით) კმაყოფილები ვართ. ძალიან მიხარია კიდევ ერთი გამოცდილი მეკარის ყოლა. ლივაკოვიჩის ტრანსფერი მომავალზე გათვლილი ნაბიჯია.”

ფრენკი დე იონგის ტრავმასა და სათამაშო წუთების გადანაწილებაზე:

“მნიშვნელოვანია, რომ ნაბიჯ-ნაბიჯ, დღიდან დღემდე ვიაროთ. ის ოდნავ უმატებს. წინ ხანგრძლივი სეზონი და ბევრი მატჩია. ფრენკი ფანტასტიკური მოთამაშეა და მიხარია, რომ შემადგენლობაში გვყავს. მუნდიალის შემდეგ ყველა მოთამაშის წუთები უნდა გავაკონტროლოთ. ყველას ენდომება თამაში, მაგრამ გუნდი ნომერ პირველია – არც მე და არც ფეხბურთელები.”

ოქროს ბურთის თემაზე მწვრთნელმა მოკლე პოზიცია დააფიქსირა:

“კამპანიების წარმოება ჩემი საქმე არ არის. რა თქმა უნდა, ჩემს გუნდში ძალიან კარგი მოთამაშეები არიან, თუმცა ამ ჯილდოების დიდი მოყვარული არ ვარ. როდესაც გუნდს წარმატება აქვს, ამ პრიზების მოგების შანსიც იზრდება.”

სატრანსფერო ფანჯრის შეფასებისას კი ფლიკმა კლუბის სპორტული დირექტორი შეაქო:

“შემადგენლობით კმაყოფილი ვარ და ზეწოლას არ განვიცდით. დეკუმ ფანტასტიკური სამუშაო შეასრულა. ჩემთვის ყველაფერი რიგზეა. მწვრთნელისთვის ყველაზე მთავარია იმ რესურსით მუშაობა, რაც ხელთ აქვს.”