ბარსელონას რაფაელ ლეაუს ტრანსფერის შანსი უჩნდება

იტალიური გამოცემა La Gazzetta dello Sport-ის ინფორმაციით, “ბარსელონა” რაფაელ ლეაუს სიტუაციით დაინტერესდა. პორტუგალიელი შემტევი “მილანის” ახალი მთავარი მწვრთნელის, რუბენ ამორიმის გეგმებში არ შედის და იტალიურმა კლუბმა შესაძლოა ფეხბურთელის გამოსყიდვის უფლებით განათხოვრება განიხილოს.

ძველი ინტერესი და ახალი შესაძლებლობა

27 წლის რაფაელ ლეაუს სახელი “ბარსელონას” ჯერ კიდევ ორი ზაფხულის წინ უკავშირდებოდა, როდესაც კატალონიელები მარცხენა ფლანგის გასაძლიერებლად ნიკო უილიამსის ტრანსფერზე მუშაობდნენ. ინტერესი გასულ ზაფხულსაც არსებობდა, თუმცა მაშინ კლუბის მთავარი პრიორიტეტი ლუის დიასი იყო. საბოლოოდ, ფინანსური სიტუაციიდან გამომდინარე, გუნდში იჯარის წესით “მანჩესტერ იუნაიტედის” შემტევი, მარკუს რეშფორდი მოვიდა.

ახლა კი, პორტუგალიის ნაკრებთან ერთად მსოფლიო ჩემპიონატის 1/16 ფინალში ხორვატიის წინააღმდეგ ჩატარებული კარგი მატჩის შემდეგ (სადაც ლეაუმ ბურთი ხარიხას მოარტყა და გონსალო რამოსს საგოლე გადაცემა გაუკეთა), იტალიური პრესა მის “ბარსელონაში” გადასვლის ვარიანტს კვლავ ააქტიურებს.

“მილანის” მოთხოვნები და ტრანსფერის ფორმულა

ვინაიდან ლეაუ თავისი თანამემამულის, “მილანის” ახალი მწვრთნელის, რუბენ ამორიმის გეგმებში არ არის, “მილანი” მისთვის ახალ კლუბს ეძებს. ფეხბურთელის გამოსასყიდი თანხა 150 მილიონ ევროს აღემატება, თუმცა La Gazzetta dello Sport-ის მტკიცებით, კლუბი მზადაა ის 60-70 მილიონ ევროდ გაყიდოს. მიუხედავად ამისა, “ბარსელონა” ამ თანხის გადახდას არ აპირებს (კატალონიელებმა რაშფორდის გამოსასყიდად შეთანხმებული 30 მილიონის გადახდაზეც უარი თქვეს).

წყაროს ცნობით, “ბარსელონამ” ფეხბურთელის სტატუსის შესახებ უბრალოდ იკითხა და კონკრეტული ნაბიჯები ჯერ არ გადაუდგამს. პორტუგალიელით ასევე ინტერესდებიან “ტოტენჰემი” და საუდის არაბეთის კლუბები. თუმცა, თუ კატალონიელები ტრანსფერზე მუშაობას გადაწყვეტენ, შესაძლოა იგივე ფორმულა გამოიყენონ, რაც გასულ ზაფხულს რაშფორდის შემთხვევაში: იჯარა გამოსყიდვის უფლებით.

7 სეზონი, 291 მატჩი და 80 გოლი

რაფაელ ლეაუს “მილანთან” კონტრაქტი 2028 წლის ივნისამდე აკავშირებს. მან იტალიურ კლუბში 7 სეზონი გაატარა, 291 მატჩი ჩაატარა და 80 გოლი გაიტანა. გარემარბის პოზიციაზე თამაშის მიუხედავად, მას კარგი საგოლე ალღო აქვს, თუმცა მისი მთავარი მინუსი არასტაბილურობაა. ლეაუს საუკეთესო პერიოდი “მილანის” მაისურით 2022 წელს ჰქონდა, როდესაც გუნდი სერია ა-ს ჩემპიონი გახდა.